樓市出更：鄉議局舊址離奇再標售

春節假期過後，樓市氣氛好似好番少少，唔少業主即刻抓緊機會出貨。好似舊年中曾經推出標售嘅九龍塘金巴倫道47號鄉議局舊址，早前聽聞有準買家出價1.93億元洽購，其實都已經貼市價。不過，唔知係唔係細節傾唔埋，所以個盤啱啱又攞出嚟招標，今次意向價約2.18億元。

第一太平戴維斯投資部副資深董事鄭漢華話，金巴倫道47號地盤面積約12,957方呎，以地積比率0.6倍計算，最高可建樓面約7,774方呎。

由於幢洋房佔地超過1萬方呎，現時同類放盤唔多，所以具罕有性，相信除咗本地家族同發展商之外，內地投資者都會有興趣。

至於截標日期就定喺三月九日。若果以最大可建樓面計，意向價約2.18億元，每方呎約2.8萬元。

金巴倫道47號原本係鄉議局局址，已經用咗約四十年，曾經考慮响搬遷後，以合作形式善用大樓，但因為沙田區嘅新鄉議局大樓落成，建築費跟隨通脹係咁升，所以最終決定將舊局址放盤出售。舊年中就委託代理標售，不過當時就賣唔出，到今年一月時，鄉議局秘書處喺執委會上話，早前有買家出價1.93億元，經研究後確認同市價相近；不過，就要求買家先繳付300萬元做保證金。

至於今次幢洋房再攞出嚟標售，究竟係因為之前個買家最終傾唔埋，定係為求公平正式做一次標售，就不得而知。

御金轉售估計平手

另外，地產代理提供嘅數據指出，舊年第四季香港一手私人豪宅市場佔41.6%個案，係由內地個人買家購入，按季下跌7.7個百分點；而期內二手豪宅市場，該類買家則佔27.2%，按季微跌1.3個百分點。

劉Sir聽聞西南九龍御金．國峯有一宗透過轉賣公司方式轉售個案，個單位位於5座，舊年以逾2,000萬元購入，近日以約2,100餘萬元賣出。

上述單位扣除釐印等開支，估計屬平手個案。