股海實戰：中電信值得押注

前日港股跌市期指大高水確有啟示，當晚美股只係微跌收場，昨日港股順勢高開166點，希臘可望避過債務違約一劫，加上有A股回穩配合，恒指全日高位見20,465點，收市報20,390點，升230點，成交增至732億元。

周日跟一位在內地從事房地產業務的表叔飯敍，席間呢位仁兄對今年內地樓市頗為悲觀，仲話要睇實大型房企動靜，一有劈價推盤，沽定內房股唔會有錯咁話！

聯想可以放心持貨

早前阿莊都有提過隻華潤置地（01109），信念只有一個，內房係處調整期，但唔係世界末日，有實力母公司支持，亦唔使憂會「消失」，只係，作為長線部署，入市毋須心急。呢位仁兄仲話，三月份或會有平貨執，皆因今年全球經濟，就睇歐洲巨債過唔過到三月呢關，過得到全球股市會有一定爆發力，過唔到就有排衰。阿莊個人唔係大淡友，但聽見一向心口有個「勇」字的表叔們都咁審慎，都係保守啲好。

保守還保守，反正阿莊個組合唔係百分百持貨，手持股份又唔差，可以放心繼續持有，只係呢期唔會咁進取再入場追貨咁話。不得不提是手持的聯想（00992），整固經已完成，昨日以全日高位6.21元收市，升4.9%。阿莊相信，嚟緊聯想業績會幾唔錯，今年更有力問鼎全球PC一哥地位，故會繼續持貨，上到6.5元樓上先至會諗食胡。

昨日提到聯通（00762）避之則吉，諗落其實今年中資電訊股中，應該可以押注中電信（00728），事關風水輪流轉，若季內中電信真係開始分銷iPhone，參考聯通舊年的表現，相信對中電信股價有一定幫助。再講，中資電訊股是長線基金的必然之選，中移（00941）多數只視為收息對象，今年進攻型當選中電信。

話中電信今年有好消息，似乎亦唔係流得晒。除咗內地傳媒報道外，近日大摩亦就此發表報告，指未來一年中移同中電信可能成為iPhone手機分銷商。既然大行都收到風，季內可以認真考慮吓如何部署。一月中旬中電信一度跌穿4元關，但低位一閃即逝，已成功重上10日及20日線，現價4.36元，若能成功企穩50日線4.48元之上，可確認扭轉下降趨勢，估計突破初期會在4.6至4.8元水平盤整，消息配合的話，年內可挑戰去年高位5.2元。