倫敦名店街搶舖一樣咁癲

有代理報料，街舖繁盛程度及租金都緊貼本港銅鑼灣同中環嘅英國名店街邦德街，啱啱就畀一家國際潮流服飾店睇中，以每年折合約3,600萬港元承租街內一幢6層高物業，租金創邦德街單宗租賃歷來新高。

早喺十八世紀，英國倫敦嘅邦德街已經係當地嘅名店街，熱鬧程度與香港嘅銅鑼灣羅素街同中環皇后大道中一樣，呎租金排名亦高踞全球五甲之內。第一太平戴維斯同劉Sir講，邦德街一向都係名店林立，數得出嘅時裝、手錶及珠寶品牌都有，所以素來都係國際品牌必爭之地。

邦德街呎租全球第四貴

而啱啱就有上述位於邦德街135至137號嘅全幢樓高6層物業，總樓面約25,000方呎，獲Belstaff睇中租晒全幢，每年租金約300萬英鎊，折合港元每月約300萬元，相對之下，呎租大約120元左右，喺嗰條街係不俗水平，可見新租客都非常睇好區內消費前景。

睇番高力國際舊年年中嘅環球零售市況報告，原來英國邦德街呎租約625元，排名全球第四，由於上述邦德街135至137號係全幢租出，計埋上面樓層，所以呎租會低少少。其實，香港名店街呎租亦好高，份報告話，香港銅鑼灣羅素街去年年中呎租982元，排名全球第二；而中環皇后大道中呎租亦達881元，排第三。代理表示，主要購物區店舖租金飆升，最大原因係名店搶租下，願意以極進取租金爭位。

黎永滔買英舖回報5厘

英國素為歐洲頂尖消費熱點同經濟重要城市之一，所以物業升值潛力極高，吸引不少投資者置業投資。如香港舖壇資深投資者黎永滔，前年早登先機，斥約3,185萬英鎊（折約4.8億港元），購入英國牛津街一幢商用物業，收租回報大約5至6厘。

佢當時話，英國樓價過去幾年下跌，依家買樓比兩、三年前仲平，所以購入作長線投資。