股海實戰：潤地揸貨有信心

龍年首個交易日金股齊鳴，恒指高開343點後，全日最高見20,453點，唔少揸咗貨過年嘅散戶當然笑逐顏開，恒指收報20,439點，升328點，成交609億元，共有37隻熊仔被強制回收。

阿莊依然相信，恒指喺20,500點水平阻力非輕，見尋日大升市成交只屬溫和，可見敢全力追貨嘅人唔係大多數。聽聞對沖基金二月份部署做淡，咁啱傳來美國維持超低息周期，以及憧憬A股下周一復市開紅盤下，唔排除今日恒指會繼續高企，等大戶部署好倉位，先至會見到較大幅度嘅調整。

中行短線吼位食胡

上周三見報，阿莊話國壽（02628）有機試衝23元關，經已到價。尋日見報推介嘅平保（02318）就頭也不回，曾高見61.5元。相對而言，內險股中，中國太平（00966）同財險（02328）走勢落後，但落後總有原因，相信要一線內險股呈極度超買，呢兩隻股追落後先至可以成氣候。

內銀股亦持續向上，阿莊手持嘅中行（03988）尋日曾高見3.36元，14日RSI已經抽到上75，相信去到3.5元前點都要抖抖氣，短線沽貨獲利動機愈來愈大。

美國將低息環境延至一四年或以後，利好商品及資源股氣氛，中鋁（02600）、招金（01818）、俄鋁（00486）、江銅（00358）股價均做好。阿莊認為，美國長期超低息，勢必令香港通脹風險增加，各位宜及早籌劃如何對抗通脹，做包租公也好，揸高息股、抗通脹債券也好，總之要善用錢搵錢，以免手持現金貶值。

相對內銀股，內房股表現落後，尋日經已見到部分獲利資金轉移陣地至內房股，恒大（03333）一口氣升穿4元關，收報4.06元，升7.98%；雅居樂（03383）及碧桂園（02007）分別升8%及4%。講到內房，阿莊仍對潤地（01109）情有獨鍾，一來華潤系股份係實力之選，二來潤地去年嘅銷售超過目標，足顯公司有能力應付逆境，有助加強持貨信心。

潤地尋日收報14.4元，升3.45%，成交1.83億元。雖然話本月以來人行透過逆回購操作，喺公開及非公開渠道釋放共4,000億人仔，變相已下調RRR一次，但市場對人行再減RRR仍存希望，為內房股帶來承接，潤地股價短線回吐守14元有可為，下一個較大嘅阻力位喺15.6元，支持位13.5元未宜有失。