荃青食正西北風 2/3大屋苑未發市

每逢農曆新年樓市都例淡，加上市道不景氣，二手交投少之又少。劉Sir參考代理數據，上個星期全港50個指標屋苑僅錄116宗成交，按周減少約14.7%，由於西鐵荃灣西站灣畔於對上一周流標收場，荃灣及青衣一帶亦順理成章成為「重災區」，包括荃灣中心、綠楊新邨及爵悅庭等上周均未發市。

上周歲晚收爐，市場又出現灣畔流標等利淡消息，市民「疊埋心水」留喺屋企煲劇好過睇樓啦。二手買賣癱瘓屬意料中事，荃灣區無成交亦合情合理。

劉Sir參考利嘉閣一份數據，上周本港50大屋苑買賣交投按周減約14.7%至116宗（反映一月十六至二十二日嘅市況），連升三周後首度回落。

新界成交周內瀉逾3成

期內荃灣同青衣屋苑成交實在慘淡得「轟烈」，兩區指標屋苑上個星期只有2宗成交。

有關資料顯示，上周荃灣及青衣共6個屋苑，有4個交投「捧蛋」，包括荃灣中心、綠楊新邨、爵悅庭以及青衣盈翠半島，荃灣麗城花園以及青衣灝景灣亦分別只有1宗成交。而上周兩區僅2宗成交，亦較對上周錄得嘅15宗銳減約86.7%。

新界區整體成交亦受拖累，該行指出，新界區上周只得49宗成交，較對上一周暴瀉約33%。反觀港島及九龍區就保持橫行及增約9%，分別錄20宗及47宗。

樓價再跌減輕供樓負擔

不過未來樓市其實又唔係咁悲觀，美國聯儲局宣布維持低息至二○一四年，而樓價走勢回落，市民供樓負擔就無咁重。中原地產研究部表示，去年下半年本港樓價開始回落，以該行CCL Mass計算，樓價至今已跌約5.3%，期內P按供樓負擔比率亦由43.1%減至現約41%。

該行預期樓價再跌約5%，而按息維持不變的話，P按供樓負擔比率料將再跌約2個百分點至39%。既然市民供樓無咁辛苦，劉Sir就祝大家龍年齊齊做業主啦。