銀主盤忽增兩成貴價貨

樓市積弱，揸重貨嘅投資者或財團，往往因睇唔好前景而速速減磅；若果周轉唔到，單位更加會被迫斷供，淪為銀主盤，被銀行推出拍賣。劉Sir同部分拍賣行傾開，話近排銀主單位數量有上升迹象，比早幾個月多咗一成到兩成。如果樓市繼續一片死寂，估計農曆新年後開始，銀主盤會進一步增加。

卓先聯席董事潘子明同劉Sir講，個樓市靜咗，依家市場上大約有近40個銀主盤供應，包括銀行同財務機構，比早幾個月前已經多咗一至兩成，其中過千萬元嘅大額銀主盤更高佔整體達兩成。相信係因為銀行方面未肯大幅落價，而大額物業唔係話咁易可以甩手，令市場累存嘅貨愈嚟愈多。

銀禧重拍一再減價

不過只要肯減價，減幅有番咁上下，都可以吸引到唔少吼「筍盤」嘅買家。好似近排沙田御龍山有個高層銀主單位，原先市場放盤價要成920萬元，其後減到去790萬元即刻沽出；早前火炭銀禧花園亦有個低層銀主單位拍賣，經歷多次拍賣減價，減價再拍賣，最終以306萬元賣出。

佢話目前每個月都有20至30個銀主盤經常喺拍賣場推出，當中絕大部分係住宅物業。相反，工商舖一類物業則較少。相信與此類物業過去價格上升幅度較大，同埋唔受額外印花稅影響有關，所以推出拍賣一般可响短期內被吸納。

經濟不景 斷供勢增

不過，今年外圍經濟充滿隱憂，本港又連番受政府遏抑政策影響，唔少分析員對今年樓市唔太樂觀，潘董話如果整體物業交投量繼續放慢，一旦市場信心大跌，「斷供」同「走佬」等情況增加一啲都唔奇。用家主導下，估計最為失勢嘅必定係投資物業，同埋以即供付款買入嘅貴價新樓，呢啲將會係未來銀主嘅新血。

佢相信情況好可能會喺農曆新年後逐步浮現，估計每個月拍賣場活躍銀主盤平均增加30至40個，而過千萬元銀主盤仍然高佔兩成比重。另外，有熟悉市場人士認為，銀行方面銀主盤嘅拍賣價，預計會因為市況，由過去傾向偏高嘅估價釐定，退而以估價偏低、甚至低於市價而定底價，如果係咁，今年市場上物業拍賣行嘅生意額就可以好番好多。