股海實戰：國壽有機試衝23元

仲以為內地GDP數據冇咩睇頭，點知數據被解讀為調控目標已實現，經濟硬着陸風險消除，滬綜指一口氣急升逾4%，走勢之強真係估佢唔到，好在手上揸住啲貨，見尋日中行（03988）升穿3.2元不但冇回，仲曾高見3.3元，一於再坐一會。

港股尋日大挾淡倉，全日收報19,627點，升615點，成交680億元。睇成交，升市相當對辦，加上升穿19,500點阻力，突破了上落格局，短線只能順勢追，別太早開淡倉。再講，尋日Shibor飆到上7.36厘，人行啟動逆回購，金額約1,690億元人仔，顯然官方亦有心解決市場流動性緊張嘅問題，只係如今放水策略唔會好似幾年前咁，一鬆就話放幾萬億咁一步到位，而係會因應實際情況，水喉掣時鬆時緊吧！

百貨股提防接火棒

尋日內房、內銀同水泥股走勢亮麗，阿莊尋日上晝見唔對路，除咗繼續揸住持貨之外，都搵嘢買，既然已經揸咗A50（02823）同中行，買吓其他瓣數，就咁揀咗周一見報推介嘅聯想集團（00992），先下首注，按平均價每股5.9元買咗6萬股。

炒家藉新春前消費旺季翻炒百貨股，金鷹（03308）、茂業（00848）、百麗（01880）升幅介乎4.5至8.9%。不過，阿莊始終認為，內地百貨業上季度銷售增長放緩，調整唔會單季就完成，上半年行業經營情況仍有暗湧，為免接下火棒，有其他選擇的話就建議另作他選，即使只係小注博反彈，亦宜見好識收。

論落後板塊，其實阿莊覺得，唔少內銀股經已拋離上月高位，但內險股表現相對落後。雖則話，落後必定有佢原因，但若然A股氣氛持續改善，持有唔少A股資產嘅內險股最終還是受益者，難怪尋日平保（02318）同國壽（02628）可以一口氣升超過7%。

唔好話追貼內銀表現，純追落後，內險股亦已有足夠上車理由。睇番國壽去年九至十月在17元水平找到承接，十一月反彈至23.8元遇阻，支持位上移至18元水平，昨日現大陽燭，重上50日線，短線企穩20元樓上，有機會試衝22至23元阻力區，10日線支持在19.5元。