三年首開殺戒代理釘牌9宗

去年地產代理監管局就新盤賣樓措施推出多項代理執業指引，代理賣新盤更加要留神，加上整體樓市因為額外印花稅而淡靜，代理心急爭生意下，便容易出現「紀律」問題。尋日地監局主席陳韻雲就同劉Sir講，舊年佢哋紀律研訊宗數多達291宗，比前一年增加咗48%；而全年亦有9宗撤銷牌照同44宗暫時吊銷牌照個案，兩數字相信係新高。

劉Sir記得，上述數字應該係該局成立以嚟新高，亦都係○八年後再有代理被撤銷牌照，而單單舊年下半年，就新增7個人被撤銷牌照，同期暫時吊銷牌照就有29人，全年暫時吊銷有44宗，按年大增57%，情況值得關注。至於罰款數字去年亦激增至112宗，按年升幅亦達四成。

地監局：執法尺度無變

不過，陳主席就好輕描淡寫話，上述嘅「紀律」問題，都係老生常談嘅問題，無咩特別，而獲撤銷牌照嘅9宗個案，都係涉及《地產代理條例》中有關持牌代理或申請人是否「適當人選」嘅問題。當然基於私隱，詳情就唔可以講，但佢就強調，呢啲聆訊都係之前幾年累積嘅個案，唔係反映舊年數字，局方執法「把尺」亦都無收緊。

陳主席亦透露，舊年考牌人數已比前一年減少，相信嚟緊幾個月持牌代理人數會有下調趨勢，但佢斬釘截鐵表明牌費無減價空間，為免加重代理負擔，亦都唔打算加牌費。

至於今年地監局嘅工作。陳主席話，佢哋上個星期已經就一手樓規管，去信政府表達意見，涉及三個同代理相關嘅範疇，包括實用面積統一定義、開售前預留單位同失實及誤導方面，提交咗建議。

二手實用面積趕諮詢

陳主席仲話，一手樓以實用面積計價錢係大勢所趨，嚟緊地監局都會响今年出番份二手樓實用面積嘅執業通告，具體詳情仲要同業界傾，了解大家想行「實用面積」同「建築面積」雙軌制，定齋行「實用面積」。

有大型地產代理集團透露，舊年後勤員工有最少相等於3.7個月月薪嘅花紅，今年後勤加薪5至8%。