股海實戰：銀基宜採保守策略

內地滬綜指眨吓眼又已回落至2,200點水平，兩市主板總成交不足800億元人仔。上海銀行隔夜拆息進一步抽高至5.47厘，市場流動性咁緊張，難怪股市好似漏氣皮球彈唔起。今日內地將會公布GDP數據，料對股市刺激作用有限，周內會否有遲來嘅放水行動，先至係市場焦點。

標普調低歐洲九國主權評級，市場關注EFSF嘅AAA評級會否受到影響，總之歐洲壇嘢長手尾，睇怕要再多一年半載先至真正穩定落嚟。

大戶沽貨資金流走

尋日中資電訊股明顯捱沽，聯通（00762）同中電信（00728）同跌逾4%，航空股喺大行唱淡之下走低，國航（00753）、南航（01055）及東航（00670）跌幅介乎4.9至8%。奇怪嘅係，流出嘅錢唔見得有去到其他板塊炒作，即係話班大戶唔係玩LONG SHORT，而係堅「沽」﹗

聽班投行朋友講，過咗元旦之後，業內風聲鶴唳，每過一個周末返到公司又唔見成枱人，咁嘅氣氛又邊有心機做嘢呢？好似尋日咁，大市成交唔到四百億元，恒指全日波幅僅84點，長期係咁落去，如何養活整個股票業界，真係一個大問題！

有內地消息指，有人大代表建議公款招待禁止飲用茅台酒，以落實推行公款消費改革，消息打擊一眾貴價白酒股，茅台及五糧液A股均跌逾半成。至於主要經銷五糧液嘅銀基（00886），尋日跌2.69%，收報6.52元。

事實上，呢幾年內地暴發戶數目與日俱增，錢多到使唔晒，咩都炒得一餐，著名白酒當然係炒家至愛。但隨着內房調控持續，內地市場流動性未有明顯改善，相信今年內地炒風都會收斂，一眾「炒物」身價趨降。即使扣除炒作因素，畢竟酒品屬非必需品，銷售或多或少受經濟增長放緩影響。所以，阿莊對呢隻股嘅睇法都略轉保守，特別係睇見上月公司大股東配股後，股價炒高一浸就冇影，都係等落番6元樓下先有得諗。

順帶一提，阿莊持倉中嘅中行（03988），若假前上到3.2元水平後無力再上，會考慮先行套現獲利。另外，呢排隻金威啤酒（00124）走勢呈異動，可以望多兩眼。