觀塘道地廠銀行搶租

近幾年成個觀塘區商業活動愈嚟愈頻繁，人流絕對拍得住尖東同中環，所以唔少銀行都搶住喺區內落戶搵生意。但由於開源道一帶地廠已經無晒位，再加上裕民坊重建在即，銀行惟有轉戰觀塘道近港鐵站一帶。啱啱就有銀行租咗嘉域大廈地下一個相連地廠部分，月租大約15.5萬元，呎租超過35元，算係幾理想嘅租金水平。

美聯工商助理營業董事吳偉華（Tony）同劉Sir講，廿幾三十年前嘅觀塘，周圍都係工廈，地下單位主要係文具或者五金商戶，銀行係唔多。

不過呢十年就明顯唔同晒，新起商廈用料愈嚟愈靚，外形時髦，唔少金融機構及專業團體都搬到觀塘，所以唔少銀行都睇準機會，落區設立分店。

開源道呎租動輒過百元

Tony仲話，近年開源道唔少地廠都畀銀行搶租晒，依家想搵個位都好難，就算有位，業主都會開天索價，呎租每方呎叫價閒閒地過百元，所以唔少銀行都寧願喺附近搵。

而啱啱嘉域大廈地下一個面積合共超過8,000方呎大地廠，放盤唔係好耐，好快就畀人租咗。

市建局20萬租嘉域大廈

其中上述由銀行租用嘅A地廠，前租客係做廣告相關生意，依家就畀銀行以每月大約15.5萬元租咗，以面積大約4,385方呎計，呎租大約35.3元，租金都算幾好。

早幾年觀塘裕民坊重建計劃如火如荼，市建局為咗方便同市民溝通，就喺輔仁街設立咗一個辦事處，依家該局租咗上述嘉域大廈地下B地廠，月租大約20萬元，以面積約3,680方呎計，呎租更成逾54元，算理想，不過就唔知該局係唔係將輔仁街個辦事處搬埋過嚟。