股海實戰：聯想放長線釣大魚

上周內地A股喺上大人嘅言論下威咗兩日，之後又回軟，上周五港股表現算係相對強，恒指喺19,200點樓上收市，一周上升611點。本周係春節前最後交易周，單係「屠熊」嘅誘因，能否促使恒指繼續挾高，只係陰謀論。站喺資金角度，若周初未有傳來好消息，相信大市交投會喺假期氣氛影響下轉靜，恒指喺受制於19,200點阻力下，有機會回試18,800點水平承接。

阿莊喺一月六日見報分析過李寧（02331），話體育用品股寒冬未過，上周五便聽到陸續有體育用品公司削減分店，行業須面對過度擴張嘅後果，整固需時，呢個板塊一年半載都難有運行。

內地零售股宜忍手

除咗體育用品股之外，其實內地零售股亦要面對經濟增長放緩、零售市道由熱轉冷嘅問題。前周初百麗（01880）股價由高位14.08元反覆回落，表現逆市而行，已知事有蹺蹊，上周四公司主動披露上季銷售數字，較市場預期差咗一截，令唔少基金跌眼鏡，故見上周五股價一度飛插落11.38元，收報11.86元，跌6.9%，成交11.7億元，沽空比率18%。阿莊相信，內地零售股調整才剛開始，目前未係撈底時候，宜盡量忍手。

臨近歲晚，內地市場流動性趨緊，見到上周五隔夜Shibor急升116個點子，報4.6363厘，乃十二月三十一日以來最高水平。但另一邊廂，又見到上周五尾市內房股全線揚高，究竟搞邊科，只有做事後孔明！

睇來睇去，傳統經濟相關嘅板塊，短期將呈個別發展，倒不如睇番啲新興產業。已進身全球個人電腦業老二嘅聯想（00992），上月三十日股價低見5.13元後，即頭也不回向上衝，上周五成功突破6元關，收報6.01元，乃自去年四月下旬以來嘅收市新高，單字一個「強」﹗

○八年金融海嘯，海外市場一時間急轉直下，柳傳志出山坐鎮，調整策略，轉攻內銷，結果聯想成功藉內地市場翻身。如今柳氏功成身退，證明聯想經已重納增長軌道，近期傳來聯想擬進軍美國智能手機市場嘅消息，業務發展令人鼓舞。

喺電腦同手機雙摩打驅動之下，聯想盈利前景樂觀，有跟進大股東增持行動，呢一刻帳面回報唔錯，但若然唔係急住套現，不妨繼續坐定定，放長線釣大魚。