樓市出更：過年黃金檔短租舖難求

農曆新年前夕係市民肯花錢嘅日子，唔少商戶都會把握呢個黃金檔期，作最後衝刺，以短約形式租街舖做生意；不過，聽好多商戶老友話，喺一線零售區已經好難搵到短約舖位，因為今年零售市場非常好景，好多靚舖一早已經畀人長約預租晒，又或者傾緊。呎租講緊兩三千元，業主寧願長租，費事短租幾個月後再搵客。

劉Sir同舖壇前輩黎永滔傾開，依家銅鑼灣等唔少靚舖已經預租晒，長約租客都要排長龍等，業主點得閒搞短租，佢相信今年想搵個舖短租，可能會係最難嘅一年。

打開報紙，每日都有唔少負面經濟新聞，但對市民買嘢意欲就完全無受影響，所以今年農曆新年前，都有好多商戶想短租舖位吸金，不過，今年情況有變。

聽資深投資者黎永滔講，承接去年聖誕旺勢，今年零售市況仍然強勁，市場上好多一線區舖位都有人問短租，但唔少已經有好多客傾緊長租，個別靚位呎租動輒兩、三千元，業主揀客都用咗唔少時間，仲邊有時間搞短租，傾呎租一、兩千元嘅細租；加上好多業主趁假期都出外玩，問盤更加難上加難，相信今年喺一線零售區，都幾難搵到短租舖。

百呎舖仔「天價」短租

不過，部分商戶就成功用銀彈打動業主短租舖位，早排一間專賣賀年物品嘅連鎖店，月前斥資每月大約40萬元，租咗銅鑼灣怡和街一個約100方呎舖仔，呎租差唔多4,000元「天價」水平，足見租客對農曆新年檔期生意充滿信心。

事實上，唔少商戶對今年農曆新年消費情況極之睇好。睇番銅鑼灣維園年宵攤位競投情況就知，場內280多個大大小小攤位，舊年十一月公開競投時，就吸引咗超過千人入場，其中告士打道入口一個單邊檔位，更加以15萬多元租出，破晒歷年紀錄。

睇番世邦魏理仕一份研究報告，截至去年第三季，本港一線零售區商舖平均呎租突破1,100元，按年升逾52%，追貼首位嘅美國紐約第五街，兩地區租金差距收窄至僅約一成。