魚缸Blogger:卡姆丹克動力轉強
大市尋日終於出現回吐，微跌56點，退守萬九關，但個別板塊就不愁寂寞，當中最搶眼嘅可算係太陽能股，喺隔晚環球多隻太陽能股股價上揚，同內地有多晶硅生產商或提價嘅雙重利好帶動下，普遍有逾一成升幅，今日就不妨跟進「晒士」較細嘅卡姆丹克（00712）。
雖然舊年內地太陽能業面臨美國嘅貿易制裁，加上供過於求，多晶硅價格更曾下瀉逾半，但物極必反，產能過剩導致企業減產，反而令多晶硅價格近月有回升迹象，其中反映行業景氣嘅環球領先太陽能指數（BLGS）已連升三日，加上英、德同埋內地對上游產品需求持續，主營產銷太陽能晶片嘅卡姆丹克自然受惠。
卡姆丹克尋日嘅成交激增，創近兩個月以來新高，股價直逼100日線阻力，且該股市值細，細細粒容易食，回吐若守穩50日線1.19元可搭轉順風車，阻力睇1.55元。