市場徐想 ：中海油抗通脹之選
近來聽新聞聽得多，都知道歐美債務不斷膨脹，照睇佢哋冇新招之下，都只會選擇印銀紙。印銀紙會造成通脹，事實擺在眼前，所以早作一步考慮買番堆資源股，不失為好選擇。
中海油（00883）主要業務係勘探、開發、生產同銷售石油、天然氣以及其他石油產品，可以話係龍頭中嘅龍頭！上一年度，美國不斷推出刺激經濟計劃同寬鬆貨幣政策，雖然經濟唔見有太大嘅復甦迹象，但油價金價同商品價就飛晒天！中國喺平穩增長下，對資源嘅需求有增無減，因此集團近幾年肥過肥仔水。
在二○一○年，集團嘅新油田產量表現優異，老油田經過產能優化後，產量亦優於預期。另外，集團近年嘅購併計劃，帶嚟唔少嘅產量貢獻，油氣淨產量大幅上升44.4%。勘探方面，集團喺舊油田嘅原油勘探搵到更多嘅油源，又係一個意外收穫！睇番數據，集團市盈率10.5倍，息率達3厘，非常吸引！繼續追蹤、出發！