股海實戰：華潤電力中線買得過

上月內地CPI按年增幅創十五個月新低，符合市場預期。A股冇咩異樣，尋日滬綜指微跌1點收市，報2,275點，暫看50日線阻力喺2,331點，支持位則介乎2,210至2,220點區域。

雖然A股有回吐，但見香港嘅內銀股表現硬淨，阿莊經已上咗車嘅中國銀行（03988），尋日一度高見3.11元，收報3.08元，升1.3%，成交15億元，短炒升到上3.2元樓上可食胡。另一隻內銀股農業銀行（01288），下周有51億股A股限售股解禁，雖然相信唔會全數流入市場，但唔多唔少令A股表現添不明朗因素。再睇其H股，去年有唔少沽空喺3.8至4元進行，雖則話其後股價曾低見2.26元，夠晒水位畀班空軍補倉，但呢個心理關口阻力唔細，短線再升一浸，建議可以先行獲利。

太陽能股大發神威

講尋日市況，不得不提太陽能股，成個板塊靜咗大半年，尋日一哄而上，其中屬中投三保之一嘅保利協鑫（03800）大發神威，股價飆13%，收報2.49元，成交達到14.3億元，主要係炒海外市場對太陽能產品需求回升。由於人氣十足，相信冇咁短癮，想跟炒嘅話，信義玻璃（00868）都可以關注吓，皆因公司去年擬分拆太陽能相關業務上市，但因市況不濟而延遲，若然呢浸板塊炒風成氣候，唔排除分拆計劃可以捲土重來！

煤價及通脹受控，加上去年獲准上調電價，為電力股去除多個緊箍咒，盈利展望有所改善。故見十二月中旬以來，包括中國電力（02380）、華能國際（00902）同華潤電力（00836）三隻電力股，股價都緩緩趨升，似乎有無形之手在密密收貨，博行業復甦。

喺咁多隻電力股之中，潤電依然係阿莊心目中嘅實力之選。潤電上月售電量同比下降2.9%，若以全年計，累計售電量按年上升15.8%。上月售電量下降，相信係經濟放緩影響電力需求，但降幅溫和，加上十二月初起，公司上調了旗下電廠電價，料有助抵銷相關影響。

去年內地全社會用電量按年增幅約11%，預計今年將因應經濟增長略為減速，按年增幅放緩至9%左右，但去年發改委兩次上調電價，並向煤企實施限價令，好明顯政策傾斜利好電企，有助扭轉火電業務長期虧損嘅局面。展望今年，政策方向會繼續扶持發電企業，行業展望正面，作為效益最高嘅電力股，潤電值得捧場。

股價方面，16元水平乃去年次季以來嘅阻力位，一旦成功突破，將可確認展新升浪，目標可上移至18元，主要支持喺13.5至14元，中線值得關注。