車位旺市一買50個

自從一○年港府推出額外印花稅辣招，二手樓市場即刻靜晒，但投資者又點會安於紅簿仔收息，部分就睇準車位求過於供，租金一直有升冇跌，不惜豪擲億元入市。劉Sir喺土地註冊處發現，恒隆或有關公司揸咗多年、一直唔捨得賣嘅天后栢景臺車位，近期就有約50個車位同部分物業登記賣出，作價1.1億元。新買家相信睇好區內嘅零售前景，所以仲以1.12億元買埋屋苑一籃子舖位，涉資共2.22億元。

今次登記賣出嘅栢景臺車位，包括L1層13個車位及L2層37個車位，另連部分物業，成交價共1.1億元。

區內代理老友話，該屋苑住宅單位差唔多近500個，而私家車位只得約250個，而且只租不賣，所以車位月租向來唔平，一般月租要3,000至3,500元，部分泊位寬敞嘅車位，更加要排隊等有冇吉位，整體嚟講，區內嘅住宅車位收租回報，閒閒地都有4厘以上。

信置海悅車位近百萬

若果用1.1億元除50個車位，每個成交價約220萬元。不過，由於今次成交連同其他物業轉售，所以實際每個車位做價，真係難以估計，而新買家仲買埋同屋苑一批舖位。據註冊處資料，該批單位新買家為GENIUS KING LIMITED，該公司董事包括陳元新及陳伽文等。

至於信置（00083）旗下將軍澳海悅豪園地庫其中50個車位及其他物業，近期都以4,800萬元登記售出，即係每個車位大約96萬元，不過成交係內部轉讓，因為買家PRIDEGATE LIMITED，根據資料顯示，該公司董事包括信置主席黃志祥。