股海實戰：中國食品股價起動

尋日A股出現回吐，但幅度有限，滬綜指跌0.4%。除咗央企入場增持之外，有趣嘅係，見到國企股鞍鋼（00347）發通告，表明公司及母公司若干高層有意喺今後半年內增持公司嘅A股，仲講埋禁售期兩年，顯然係要和應提振股市嘅呼籲。雖則話各高層擬買入嘅股數有限，但起碼表態屬政治正確，唔排除會陸續有國企高層響應。

溫總嘅六字真言「提振股市信心」真係有啲料到！尋日恒指低見18,983點後就跌唔落，尾市曾高見19,175點，收報19,151點，升147點，成交533億元。暫時睇恒指是浪若能升穿19,200點，可打破上落市格局，下一個較大阻力位喺19,500點水平。

官方動員入市護航

除咗央企入市增持A股，國企高層亦表態買貨外，社保方面亦提議分步推進地方養老金入市，總之官方機構正全方位動員長線資金為股市護航，為免錯失搵錢機會，持大比例現金者，適量提升股票持倉，小注試試水溫。

今日內地將公布十二月CPI等數據，如無意外將再次見到通脹受控。講到CPI，由於本月及下月有春節效應，食品價格可能喺旺季需求帶動下略為回升，帶動CPI略有反彈亦唔出奇，但通脹受控嘅大局未有改變。

講開食品，早前康師傅（00322）宣布與百事組戰略聯盟，可謂衝着競爭對手可口可樂而來。目前，中國食品（00506）透過與合營中糧可口可樂飲料，擁有全國十六個省、市、自治區嘅可口可樂飲料產品經營權，獲授權裝瓶生產及配送銷售可口可樂系列汽水，並配送銷售可口可樂系列果汁、果奶、茶和水等不含氣飲料。面對競爭勢必加劇，唔排除今年合營會有大動作，以鞏固競爭優勢。

再講，通脹受控，糧油限價鬆綁，加上成本壓力紓緩，呢啲因素都對中國食品有利。上月中旬其股價低見5.6元後反覆回揚，已重上6元樓上，且現黃金交叉，若消息配合起動，目標試衝6.5至6.6元阻力區，短線回吐宜守5.8元。