甲廈無單開又返海嘯

舊年歐洲多國經濟爆煲，環球金融市場氣氛謝晒，香港商業核心區嘅寫字樓買賣成交亦難免被拖累，睇番差餉物業估價署嘅資料，舊年八至十月，中區甲級寫字樓每個月買賣成交5宗都無，十一月就更淒涼，未有錄得成交個案，係○八年十月之後首月「食蛋」。不過，有代理老友收到風，銀行今年將搶攻按揭市場，有機會刺激寫字樓成交量多番。

有唔少寫字樓部代理同劉Sir呻，話好多個月都無開單做生意；睇番差餉物業估價署最新資料，原來舊年下半年開始，中區甲級寫字樓買賣已經開始乾塘，八至十月連續三個月，每個月成交量5宗都唔夠，如此慘況，同○八年金融海嘯爆發嗰年嘅下半年不相伯仲。而緊接十一月情況就更嚴峻，該署更罕有地未有錄得成交個案，係○八年十月後首見。

成交量半年少近六成

不過，目前仍然有唔少資金流入優質寫字樓市場，所以寫字樓做價仍然能夠逆市企穩。據差餉物業估價署資料，舊年上半年，中區甲級寫字樓平均呎價徘徊約2.5萬多至2.9萬餘元，而下半年撇除少於5宗交易月份，呎價仍企穩近2.9萬元。

至於整體寫字樓買賣方面，舊年下半年價、量明顯失色。睇番該署資料，舊年上半年各月成交宗數約270至430多宗，期內整體寫字樓買賣共約2,065宗；而去年七至十一月，各月成交降至約100餘至220餘宗，買賣宗數明顯減少，該五個月暫共只錄得865宗，下半年買賣宗數較上半年仍相差約58%。

而美聯商業董事翁鴻祥就認為，銀行去年中起閂水喉，收緊各類物業嘅按揭成數，同埋對按揭嘅審批更趨嚴謹，寫字樓買賣大受影響，成交按月減少。

銀行爭按揭交投望升

不過，翁氏估計，銀行今年有機會積極爭取按揭市場嘅佔有率，如此一來，可望刺激寫字樓買賣成交逐步增加。