短炒倉：雷士照明 買定離手

「各位觀眾，賭……神！」睇得港產賭片多，自問對賭神必勝法都算略有領會，就係賭神喺賭局上半段必定要處於下風，甚至輸到要將手手腳腳擺埋上枱做賭注，咁先至可以喺最後一鋪牌反敗為勝。

去年八月，雷士照明（02222）董事長吳長江同滙豐私人銀行（瑞士）訂立了一項看漲股權衍生品交易，內容是吳氏可按3.7元作價買入5,000萬股雷士，而當日雷士收市價為3.52元，即吳氏是「賭」股價上升。不過之後事與願違，雷士股價大幅向下，賭局上半場，吳氏可謂輸得慘烈。

睇番吳氏解畫，係認為當時雷士股價被低估，而且期權效期係訂立後六至十二個月，到時雷士一一年全年業績已公布，定可刺激股價上升。的確，雷士中期盈利同比增長達52.6%，加上內地以LED燈代替白熾燈的政策已於今年執行，難怪吳氏對雷士全年業績充滿信心，並頻頻回購，自去年十二月以來，已六度回購4,740萬股，最近一次是本月四日，以均價2.829元買入43萬股。結合回購同業績期近的種種迹象看來，不排除雷士有一鋪翻本的機會。賭神正慢動作進場，大家買定離手。

雷士照明（02222）

阻力位：3.4元

支持位：2.8元