股海實戰：雨潤吸引基金進場

內地股市繼續走高，滬綜指再升2.6%，成交放量，兩市主板總成交額1,670億元人仔，真係好耐冇見咁熱鬧嘅場面！事實上，雖然中央未有再高調放水放生炒家，但卻努力推動多項新政策出台，引導長線資金入市，呢一點對長線投資者而言，可謂打了一支強心針。

阿莊唔敢講A股係咪已經見底，但目前處於相對低嘅水平，卻可以肯定。一直話會再增持A50（02823），尋日見A股交投對辦，遂入市按平均單位價格10.6元，增持5萬股，另等唔到低吸中國銀行（03988）嘅機會，尋日入市以均價2.96元追入30萬股。

港人RQFII將為A股帶來新資金，正所謂「有來有往」，近日有消息指醞釀多時嘅港股ETF亦已獲中證監放行，並已上報國務院。雖然推出初期兩者嘅資金規模唔係好大，但成功開展運作嘅話意義深遠。

奢侈品股宜迴避

雖然話年頭可以買番啲股票放喺倉，但有個別板塊還是一避為妙。好似里昂證券最近引述專門銷售名錶的亨得利（03389）同東方表行（00398）指，去年十一及十二月銷售情況顯著轉差。唔排除今年奢侈品股將進入調整年，銷售下降，產品價格同估值均有下調壓力，故即使要追貨，呢個板塊暫宜迴避，持貨亦宜把握機會落車。

挨年近晚，乃食品銷售旺季，雨潤食品（01068）自本月以來股價唔經唔覺最多累升16.8%，尋日高位見11.92元，收報11.74元，升5.39%。一一年內地食品股可謂多災多難，誠如雨潤所講，喺去年上半年一些媒體就其業務及運營作出連續嘅負面失實報道，加上生豬價格上升，去年第三季其屠宰量及深加工業務銷售同比分別減少4%及18%，利潤則同比下跌約25%，料末季情況仍然困難。

內地食品安全係一個老問題，要解決不得不從監管、採購、生產及銷售標準等多方面作出改革，即使係大型企業，有心做好本分，有時亦難以避免出問題。但無論係監管者、生產者抑或消費者，對食品安全嘅意識都有所提高。在產品質素要求提升之下，其實有利大型業者嘅發展。

展望今年，通脹受控，豬價有望持續趨穩，加上圍繞公司嘅負面報道事件已成過去，相信業績可逐步重納正軌。現價估值尚處低水平，新年伊始，吸引基金進場部署並不足奇。繼續慢火煎魚，短線回吐守穩11元可關注，目標反覆向13.5元推進，止蝕10.2元。