舊樓強拍罕見鬥舉牌

政府降低舊樓重建門檻，鼓勵更多財團購併舊樓增土儲，令近排舊樓強拍一個接一個，甚至出現其他財團「搶奪」情況。尋日強拍嘅香港仔登豐街1及3號舊樓，就出現多年以來罕見嘅激烈競投，幢舊樓由九龍建業（00034）持有逾九成業權，被一私人財團出價爭奪，雙方「過招」共34口，最後九建要搶高三成先奪得項目，係○五年大坑麗星樓後競爭最激烈嘅一次強拍。

據了解，登豐街1及3號已經被九建收購逾九成業權，今次九建主席柯為湘大公子柯沛鈞首次現身拍賣場，親自以3號牌競投，該舊樓拍賣底價5,142萬元，第二口叫價5,200萬元，其後每口叫價加50萬元。

柯為湘公子親自競投

不過，柯氏未及舉牌承價，已由一私人財團攔路搶先承價，雙方一度爭持不下，現場氣氛熱烈，雙方共承34口價，柯氏表現淡定，最終以6,800萬元投得，比底價高出32.2%。

毗鄰舊樓拍賣勢激鬥

今次競爭咁激烈，劉Sir即刻搵番歷年嘅強拍紀錄，原來今次係繼○五年一月麗星樓強拍之後最激烈嘅一次，當年麗星樓拍賣底價12.09億元，經過一輪競爭，最終被置地公司以17.1億元投得，足足高出底價四成一，經發展後成為今日嘅上林。

上述舊樓毗鄰的多個冧把將陸續推出強拍，萊坊陳致馨稱，登豐街5及7號街嘅大業主亦為九建，估計最快本月底強拍餘下業權；至於登豐街9及11號，亦已經排緊期聆訊。

另外，一私人財團持有大部分業權嘅大角咀福澤街12至22號仁利大樓，啱啱獲法庭頒令強制拍賣，底價3.3305億元，幢舊樓由三組六層高物業組成，共72個不可分割業權，現時樓齡逾四十年。