股海實戰：中通服供股跟得過

二○一二年A股首個交易日紅盤高開，惜高位缺乏承接，滬綜指未能企穩喺2,200點樓上，尾市跌幅擴大，收報2,169點，跌30點，表現令人失望。港股午後受A股拖累跌幅略為擴大，恒指收報18,727點，跌150點，成交427億元。

A股提不起勁，事緣溫總新年訪湖南期間，提到中央已經明確實行穩健嘅貨幣政策，又提到目前「市場偏冷」，「從全國來說，一季度可能比較困難」，總之，似乎中央不急於放水挺市，春節前再減存準率嘅機會，可能未如先前想像般大。

憧憬利好政策出台

全國商務工作會議今日召開，市場關注會議會否公布一系列刺激消費嘅措施。阿莊相信，即使傳來好消息，對相關股份表現有一定嘅刺激作用，但對於拉升股指表現嘅動力，則不宜作過分憧憬。

異動股方面，尋日中通服（00552）成跌市奇葩，高位做3.88元，收報3.85元，升8.45%，成交8,408萬元。去年三月中通服宣布供股計劃，但要搞到上月先至收到中證監批文，H股每股十供二，每股供3.19元；另內資股亦為十供二，作價每股2.59元人仔。H股將於周五除權，換言之，今日係除權前最後交易日。

預計今次公司供股集資約29億元人仔，將用於拓展海外業務及戰略購併等。自去年三月宣布供股計劃，其股價由5.6元反覆回落至十月低位僅3元，大行高盛將跌勢歸咎於公司提出供股嘅時機欠佳，且以公司負債比率47%，舉債應付業務發展所需，可能較供股可取。但老實講，今次公司集資讓全體股東有機會參與，而且提出嘅時候股價尚處5.6元，相比下，供股價3.19元有吸引力，誰料到八月開始港股急挫，隻股亦一度跌穿埋供股價。

尋日股價異動，相信係有投資者想喺除權前買入參與供股有關，話唔定今日借機推上4元邊。睇隻股○八年最差嗰時股價見過2.9元，過去三個財政年度盈利均錄得雙位數增長，現價往績PE十倍，息率近4厘，估值有數得計，作為穩陣嘅投資，照計亦供得過。