商廈升幅乙級挑戰贏晒

舊年港島中區甲級商廈新供應唔多，令到做價高企，唔少資金寧願轉投港島其他乙級商廈，帶動呢類乙級商廈樓價舊年表現唔錯；七月嘅時候平均呎價仲一度去到8,147元，創紀錄新高，雖然到年尾跟隨大市回落到約8,075元，不過全年仍升近16%，比同期甲級商廈升幅高出接近3個百分點。

綜合美聯商業及市場資訊，港島乙級商廈舊年初平均呎價只係約6,969元，之後連升六個月，到七月平均呎價已經升到約8,147元。不過，其後歐債危機重現，連商廈市況都受影響，價量回落，去到年尾乙級商廈平均呎價跌至約8,075元，但計落全年都升約15.9%，相比同期甲級商廈平均呎價升約13.4%至16,502元，升幅更加理想。

「摸王」接連掃兩層

由於乙級商廈做價升幅優勝，吸引各方資金流入。長實（00001）執行董事趙國雄同家人舊年用約1,800萬元買入灣仔宜發大廈25樓及有關部分作自用，以面積約1,688方呎計，呎價約10,664元。有代理同劉Sir講，宜發大廈呎價突破1萬元，係該廈金融海嘯後新指標。

資深投資者黎汝遠舊年先用約1,315萬元買入灣仔嘉洛商業大廈高層全層，之後再斥資5,163萬元買入上環德輔道西九號中層全層。

內資染指 價睇升10%

除本地資金外，內地資金亦開始染指商廈市場，聽市場講，一名內地投資者去年購入灣仔生和大廈高層全層，成交價約1,426萬元，亦係該廈新高。美聯商業董事麥世強話，由於唔少港島乙級商廈單位入場費只係千零萬，呎價約6,000至8,000元，所以深得用家同投資者歡心，估計今年上半年呢類單位，樓價仍然有約5至10%升幅，預計比甲級商廈同期升幅約3至5%仲要好。