Fundman睇市：銀行股有博反彈條件

去年有98%時間跑贏大市的蒙牛（02319），臨年尾整單毒奶新聞，唔少放緊假嘅芬佬倒瀉籮蟹，港交所（00388）資料顯示，蒙牛捧場客富達基金，收爐前以平均20.468元，沽掉1,966萬股，持股量降至4.89%，依例再沽都唔使披露。近期聽聞，唔少中小型中資基金，都揸重呢隻outperformer諗住避險過年，但臨收爐至嚟插水，嚴重的連年終份成績表都有影響。

過去三個交易日，蒙牛股價似乎在18元搵到支持，今次驗出黃曲霉毒素，由於未有產品流出市面，影響明顯不及三年前的三聚氰氨事件嚴重，上次蒙牛股價用了十五個月收復失地，業績受影響大約三季，今次情況可望較短暫。問題是，上次危機，市銷率（PS）及往績市盈率跌至0.31倍及7.6倍的超級低點，今次只係回到0.78倍及19.2倍，沒有上次的極端，相信博反彈的期望回報，也需要稍為保守一點。

大行全面睇淡後市

溫爺爺舊年十月提出定點微調，十一及十二月中國採購經理指數立即出現轉機，假期前公布PMI已重返50樓上，去到50.3。另一邊廂，歐央行無限量以低息供應流動性給歐洲商業銀行，實行變相「QE」，儘管「歐豬」債息只係跌三格反彈兩格，反映歐銀行賓架先以自保為主，並無心口掛住個勇字走去大規模「桿槓化」，但眼前形勢，要夾硬唱淡，似乎並無太多客觀因素配合，港股踏入二○一二年第一個交易日，已見乾升的情況，恒指升443點，報18,877點，總成交328億，睇落毫不起眼，死硬派淡友恐怕會輸得條氣唔多順。

每逢年初，各大行都會訂出恒指目標，睇番今年最樂觀嘅高盛，都只係訂22,000點！由過往記錄，這類指數同馬經一樣，睇吓無妨盡信傷身，唔信？一一年頭通街一面倒唱好，話恒指見28,000點甚至升穿32,000點創新高成為主流，結果跌4,000幾點通街眼鏡碎！如今連高盛都估大市只會由現水平升16.5%，意味街外睇淡嘅佔大多數，股市金科玉律：群眾永遠是錯的！今年意大利、西班牙會進入再融資高峰期，歐央行可唔可以保住歐元不致解體，史提芬無水晶球，但在罕有集體睇淡下，經驗話畀我聽，股市表現未必太差。

執筆時，意、西兩國十年債息分別報6.85厘及5.1厘，遠低於去年十一月高位7.55厘及6.69厘，歐洲銀行股帶住歐股反彈。睇番港股，滙控（00005）亦係昨日升市功臣，一隻股票貢獻指數72點進帳，今年股價見56元當日，正係西班牙債息抽上6.69厘，市場怕歐豬火燒連環船，要大幅撇帳的十一月廿五日。目前銀行股已經再無人提估值，反而成為市場對金融系統安全性看法的寒暑表，假如歐債危機最壞時刻已過，踏入一二年，積弱的銀行股確實有條件成為博反彈首選。

滙控現價60.55元，較低位升8%，升得少同九、十月跌得少有關，但九月至今，滙控四次跌穿60元，尋日亦係第四次收復失地，只要守住這心理關口，56元三底會起到支持，有機會在第一季測試68至70元的阻力區。