股海實戰：華潤創業隨時展升浪

內地PMI重返盛衰分界線之上，帶動一二年第一個交易日港股紅盤高開高收，股民稍感安慰，但願意落場買貨嘅依然唔多，事關假期間未見人行再減存款準備金率，加上今日A股復市又唔知搞邊科，唔少冇貨喺手嘅股民索性繼續齋睇！

每逢新年，阿莊都會相約一班經紀朋友中午飯敍慶節，今年也不例外，但由於經已延長咗交易時間，故聚餐僅一個鐘多啲，真係來去匆匆！席間揸咗貨過年嘅經紀朋友笑得最燦爛，晨早開市就沽貨食胡，但呢類獲利例子唔係太多，皆因唔少老友假期前已清貨放假，尋日睇見恒指高開336點，追貨意欲唔大，見大市成交僅略增至328億元，便可知一二。

中東局勢再起波瀾，伊朗發出警告，若再次見到美軍出現在波斯灣便會採取行動，亦有報道指伊朗已成功煉製首支核原料棒，難怪金價同油價做好，一二年第一「炮」會否近在咫尺，為後市增添變數。

中央積極維穩股市

回說內地，全國金融工作會議將於周內召開，雖然講嘅係長遠政策，但對金融業發展有深遠啟示，勢成市場焦點。目前A股估值處於相對低嘅水平，但適逢今年有政府換屆因素，加上宏調持續，大大影響魚缸承接力。不過，細心睇其實上大人都有做嘢，例如去年末季下降存準率、匯金入場掃入內銀A股等，近日中證監修改收購管理辦法，簡化購併重組嘅行政關卡，並鼓勵上市公司控股股東喺合理價位增持股份，相信目的亦不離增強穩定股市嘅力量。

此外，市場亦憧憬商務部等多個部委將聯手推出促進消費措施，故見尋日家電股炒上，創維（00751）、海爾（01169）及國美（00493）升幅介乎6.4至8.8%不等，汽車股東風（00489）、廣汽（02238）及華晨（01114）亦同升逾4%。但阿莊始終覺得，喺過去兩年嘅高基數之下，呢兩個板塊必須要有重大利好因素配合，始能作出突破，為免押錯注，高追宜三思。

相對之下，阿莊都係傾向從心頭好埋手，入場以平均價27元買入尋日提及嘅華創（00291）30,000股，貪其從事零售超市、啤酒、食品及飲品多元化嘅消費業務，四平八穩，尋日收27.25元，新年第一擊暫時有個好開始。

回顧去年，華創股價長期呈調整，主要反映前年底以來內地對外資企業徵收城建稅和教育費等附加稅項，以及員工成本上升及加快開設零售點令成本壓力增加等因素，但現價估值應已作反映。隨着旗下各項業務積極整合，中長線規模效益將帶動盈利增長，加上公司處淨現金狀態，截至去年六月底止手頭現金16億元，可繼續走購併戰略，若然有政策消息配合，股價有條件重演○九年嘅升勢。