股海實戰：新華保險博重上水面

十二月期指昨日結算，恒指隨外圍低開，全日波幅僅115點，收報18,397點，跌120點，成交291億元，下月期指低水87點。今日係二○一一年最後一個交易日，預計市況會更加淡靜，所以最好都係放假，等長假完結後再戰金魚缸。

呢排上行見到班經紀都係冇聲冇氣，點知尋日大清早就見班經紀圍埋喺度睇報紙，仲講得興高采烈，以為有咩好路數，誰知大家喺度講緊一則關於一位前聯交所高層嘅負面新聞。聽班經紀話，由該新聞可見，當年呢位仁兄不受經紀業界歡迎，實在有其原因！其實人叻有傲氣唔怪得，但過咗火位，目中無人兼冇品，咁樣遲早撞板，最終吃虧嘅都係自己！

蒙牛未跌定勿沾手

產品再出問題嘅蒙牛（02319），股價仍未跌定，正所謂「一沉百踩」，尋日瑞信加把口話將其目標價調低至18元，隻股真係二話不說插到落全日低位18.02元。所以話，有咁多好嘢買，博呢啲「當頭跌」反彈，無異於火中取栗！

今年，全國廿四個省份調整最低工資標準，平均增幅為22%，咁啱出口市場仍未見復甦，廠商生意難做兼面對勞工成本上升及人仔升值兩大衝擊，真係度日如年！咁究竟元旦假後，人行會唔會一如坊間所料，再調低RRR，落實「微調」？政策市一向難估，但睇見A股一浪低於一浪，已反映明年政府換屆前宏觀經濟政策大改嘅可能性唔大，A股可能繼續有反彈但冇升幅。

臨年尾趕上尾班車，本月中旬以A+H股上市嘅新華保險（01336），其H股招股價28.5元，掛牌後一直潛水，最高見過26.6元，最低做22.95元，認購嘅大戶們真係牙痛咁聲！不過，尋日新華保險H股逆市走高，全日高位見25.95元，收報25.55元，升3.65%，其A股（601336）亦升3.6%，收報28.12元人仔，乃掛牌以來收市新高。

見到聯席保薦人瑞銀喺本月廿日及廿二日先後入場增持該股，每股平均作價分別為24.322元及24.139元。阿莊記得表叔線話呢隻股後台硬淨可長線睇好，之但係短炒得唔得，就要睇市況同政策消息配唔配合。純睇走勢，若能以大成交升穿26.6元，可小注一試博上水面，跌穿24.5元止蝕。