鰂魚涌兩幢舊樓就快起飛

中環商廈租金不斷飆升，令到不少企業搬去港島東區，因而令到東區商廈租金有支持，部分發展商就睇好區內商廈市場，所以向區內嘅舊樓業主埋手。劉Sir翻查土地註冊處紀錄，原來樓齡約五十年嘅海傍新樓同海灣大廈，最近罕有地出現約49宗買賣登記。

由於大部分單位係均一價550萬元成交，涉資約2.98億元，不排除有財團收購，由於兩幢大廈毗鄰就係太古坊，市場估計太古地產或有關人士應該對項目有興趣。

海傍新樓一伙550萬

海傍新樓同海灣大廈依家都係樓高不足十層嘅物業，若果重建潛力會相當優厚。其中海傍新樓最近錄到約39宗買賣登記，當中包括一宗係非住宅樓面成交，做價為1,920萬元，其餘除咗幾個單位成交價450萬元之外，其中都係均一價550萬元。

好似一個35號室，○六年購入價只係96萬元，現時以550萬元售出，升值約4.7倍，唔單止跑贏大市，仲好過豪宅物業。

海灣大廈貴1.5倍轉手

至於同海傍新樓一街之隔嘅海灣大廈，近期亦錄到10宗買賣登記，涉資共5,500萬元，有一個15室去年成交價唔夠220萬元，現時成交價達550萬元，升幅約1.5倍。

太古坊由太古地產發展，又稱為港島東矩陣，裏面至今已發展成十幢商廈，其中林肯大廈同多盛大廈等係第一期發展；而第二期發展就將包括依家仲用緊嘅常盛大廈、康和大廈同和域大廈3幢工業樓，發展商已經計劃重建為兩幢商廈，未來新增嘅商廈樓面可以超過200萬方呎。

據講，第二期發展計劃係分兩部分重建，構思先重建常盛大廈同康和大廈，重建為一幢51層高商廈，之後最快到二○一六年後先啟動和域大廈嘅重建工作，到時會起一幢約46層高商廈。

另土地註冊處資料，深水埗荔枝角道93號友豐大廈1至13樓等部分樓面錄得成交，涉資9,998萬元。