市場徐想：新華保險力爭上游
近日新股趁年尾爭相上市，雖然掛牌後股價表現麻麻，但新華保險（01336）本身實力不俗，不宜忽視。新華保險集中內地壽險業務，期望喺呢幾年佔據市場領先地位。公司○四年以嚟，喺全國壽險界都係頭五位，市佔率由○八年嘅7.6%，升到一○年嘅8.9%。雖然增長唔係好標青，都算係交到功課。公司一○年中國原保險保費收入當中，喺北京、上海、廣東等大城市，市場份額都係頭四名。
新華保險勝在靈活多變，雖然冇其他大型保險公司分銷網絡咁多，但公司嘅分銷機構勝在效能高，能創造出更高嘅利潤。截至今年六月為止，公司有超過20.4萬成員，喺全國有2.5萬個銀行保險分銷網點，當中有1.5萬人係銀行保險專管員，專業水平毋庸置疑。
集團勝在細細粒，市場仍有好大發展空間。當中，匯金持股31%，上年度每股盈利2.2元，現價24.15元，市盈率約十一倍。