股海實戰：中行不妨吼位買貨

歐洲央行進行無上限、三年期長期再融資操作，共釋放4,892億歐元，遠高於市場預期，唔多唔少反映歐洲銀行真係好等錢使！內地方面，滬綜指反彈乏力，港股失去靠山，長假前走勢持續偏軟，恒指全日波幅僅150點，收報18,378點，跌38點，成交335億元。

尋日兩隻新股首日掛牌，分別係中國織材（03778）及京能（00579），相對招股價，前者升22%，後者則無升跌。表叔線話可以𥄫實隻京能，估計掛牌初段收集過後始見真章咁話，不妨睇吓堅定流！

內房股全線反撲

雖然消息指，包括北京、上海、廣州等十個城市明年擬繼續執行限購令，但另一邊廂，內地傳媒報道，十二月十一至十五日，四大商業銀行的新增貸款急增，內房股全線反撲，恒大（03333）、雅居樂（03383）及碧桂園（02007）升幅介乎3至4%。

查實內房「調控」呢個緊箍咒絲毫未見放鬆，貿貿然入市博內房股反彈，小心會接下火棒。若然想買定些少貨過年，阿莊傾向選擇內銀。

首先，隨着近次人行調低RRR，市場流動性有所改善，加上若然四大商行近期新增貸款額度真係明顯增加，對內銀而言都屬正面消息；第二，為保經濟增長，估計明年銀行新增貸款額有增無減，板塊氣氛有望好轉。其三，恒指本周初一度回落至接近上月低位，但見到四大內銀工行（01398）、中行（03988）、農行（01288）及建行（00939）嘅股價仍高於上月低位，表現較恒指強。最後一點，十月匯金入市掃入內銀A股，估計仲有下文，有助穩定內銀股價表現。

綜合而言，阿莊中線已買入首注A50（02823），會繼續持有，並留意加注機會。至於內銀股，今日會睇睇有冇機會買些少中行，事關見其月初以來，10日線一連重上20日及50日線，近日20日線亦已重上50日線，動力正在增強，2.8元邊小注，向上較大阻力喺3.2元，支持位2.57元。