樓市出更：老手備10億明年做大deal

今年外圍經濟風高浪急，香港唔少投資老手都話，寧願唔買，都好過買錯貨要坐艇，所以大家都好忍手，好似依家揸住市值逾百億元物業嘅紀惠集團，其行政總裁湯文亮同劉sir講，今年公司或相關人士只係用咗五、六億元買貨，相比起近幾年每年閒閒地擲約十億元入市，差一大截。

不過，佢認為銀行出年好可能放水，所以樓市應該有運行，所以已準備明年出手入市，投資額最少十億元。

今年忍手僅6億買貨

湯文亮對經濟及樓市走勢素有研究，早前更加著書立說，佢話今年環球經濟可謂多事之秋，美國經濟前景令人憂慮，歐洲多國債務問題更加係一浪接一浪，香港亦難獨善其身，所以今年入市都好審慎。

佢數吓手指、計計數，今年紀惠或相關人士買嘅商用或者住宅等物業唔多，大約用咗五、六億元左右。其中，九龍塘施他佛道4號屋地，可建總樓面約5,977方呎，涉資約2.508億元，每方呎樓面地價高達4萬多元；另外，亦用約5,000萬元買入赤柱大街雙號全幢零售物業，面積約4,000方呎，呎價約1.2萬多元。

每月成交料返一萬宗

對於明年個市，湯生話，大家都抱怨額外印花稅拖垮樓市，佢認為政府未必朝令夕改，咁輕易就將措施撤銷。不過，由於銀行明年可能會放水，加埋內地調低存款準備金率，香港樓市應有轉機，估計每月成交量可以回升到約1萬宗水平，即全年可望重上12萬宗左右。佢仲透露，紀惠已經磨拳擦掌，預備喺明年第四季左右入市，目標物業都係熟識的甲級商廈及商舖等。

雖然年終將至，但市場亦不乏逾億元大deal。據悉，新地（00016）旗下公司有份嘅尖沙咀棉登徑7號1至13樓及有關商用樓面，早前以3.5億元賣咗。聽講上址依家係一幢酒店，提供房間約64個。