股海實戰：昆侖能源迎接新升浪

美國新屋動工創半年新高，前晚道指急升逾300點，港股尋日順勢高開，惜未能一舉突破18,500點阻力位。午後滬綜指再次跌穿2,200點關，但喺預期歐美股市持續向好之下，恒指成功守喺18,400點樓上收市，報18,416點，升336點。

阿莊仲好記得，舊年聖誕節，阿爺出其不意大派「聖誕禮物」，宣布調高銀行一年期存貸基準利率各0.25厘。如今通脹已受控，今個聖誕節即使再有「驚喜」，斷估都係減RRR而唔係升息。但可惜，拖累尋日A股嘅其中一個原因，正係人行開始暫停正回購操作，顯示年底前再次減RRR嘅機會微。短線「放水」無望，股民亦惟有死心沽貨離場。

A股水緊情況加劇

另外兩個不利A股嘅因素，乃上海等城市明年將繼續實施限購令，以及平保A股宣布發行CB集資260億元人仔，令本已「缺水」嘅A股市場流動性進一步趨緊。睇咁嘅環境，依家A股投資者惟有「戒急用忍」，希望踏入明年，內銀可動用新一年嘅新增貸款額度，市場流動性會逐步得到改善。

新奧能源（02688）同中石化（00386）擬收購中國燃氣（00384）的計劃，成事與否仍要拭目以待。但查實若睇好燃氣板塊，中石油（00857）旗下嘅下游業務旗艦昆侖能源（00135），係現成嘅優質之選。

昆能剛宣布完成向中石油收購北京天然氣管道60%權益。北京天然氣管道主要擁有和經營陝西至北京管道運輸，向京、津、河北、山東、山西及陝西輸送天然氣。高盛及大摩先後發報告唱好昆能，且不約而同認為注資活動陸續有來。

阿莊亦不只一次講過，作為一家大型老國企嘅中石油，要擦出火花唔容易，透過收購紅籌公司拓展中下游業務，符合母公司加大力度拓展下游環保能源策略，亦造就了昆能股價由○九年初嘅2個幾，升到上14.5元嘅大升浪！

呢次昆能發行代價股份每股作價10.02元，中石油嘅持股量會由50.54%增至65.67%，呢個價可視為重要參考指標。母公司既掌握全國最大的石油上游資源，加上注資行動陸續有來，前景能見度高。再睇其股價走勢，喺10元邊浮沉咗足足兩年，若然明年燃氣板塊成氣候，喺注資效益嘅帶動下，昆能股價可望迎來新升浪！