魚缸Blogger：創科強勢突破阻力
隔晚歐美頻頻傳出好消息，西班牙拍債理想同美國上月新屋動工量創年半新高，最終尋日將港股推高至18,400點樓上收市。美國樓市初現復甦苗頭，港股方面不妨𥄫實主營北美電動工具同地板護理業務嘅老牌工業股創科實業（00669）。
創科今年上半年營業額同純利早已創新高，分別達17.84億美元同8,026萬美元，加上主要客仔美國Home Depot早前調高今年全年每股盈利預測，意味住創科今年全年業績，喺近月美國零售、就業同樓市數據都理想下，應該會有啲睇頭。創科尋日成交配合下曾衝穿八月底以來嘅頭肩底頸線阻力，跟進阻力位先睇8.5元，支持位7.4元。
創科實業（00669）
阻力位：8.5元
支持位：7.4元