淡季(抓)客甲廈鬥劈租

由於政府舊年推出嘅樓市措施，未有針對工商物業市場，所以商廈市場今年個勢原本唔錯，但可惜近幾個月歐債危機重現，令到商廈租務市況都急轉直下，最近連港島甲級商廈都有業主要減租搶客，一般願意減租嘅業主，接受減幅約7%至10%，好似中環永安集團大廈有低層戶業主剛劈租約7.5%，單位終獲專業團體以每月約13萬元承租，呎租約37元。

聽市場講，上述減價租出嘅永安集團大廈低層單位，面積約3,500方呎，業主月前意向呎租約40元左右，但始終未能租出，近期終決定每方呎減租約3元，減幅約7.5%後，以每月約13萬元租出；而同廈另一個中層面積約1,200方呎放租單位，業主最近都減租約10.8%，去年每方呎約33元，最新月租叫價近4萬元。

美銀中心減8%求租

地產代理老友同劉Sir講，早排港島甲級商廈業主租金叫價普遍仍然堅持，啲業主寧願以加佣同獎金，鼓勵代理協助出租單位，不過此招似乎都唔係好收效，所以近期選擇直接減租吸客嘅業主明顯多咗。

即使向來唔憂租嘅金鐘甲級商廈，都出現減價求租個案，其中金鐘美國銀行中心一個低層面積約1,000方呎單位，業主近期調低意向呎租至約55元求租，減幅約8.3%，月租約5.5萬元。至於灣仔會展廣場辦公大樓中層戶最新每方呎意向呎租約58元，月租約15.1萬元，比之前都下調約7.9%。

美聯商業助理營業董事羅仲英話，若果商廈單位唔能夠趕及春節前租出，單位好大機會要等到明年二月中先有人洽租，所以近期業主寧願減少少將單位盡快租出，至少呢幾個月嘅管理費同差餉等開支可以由租客負責，慳番部分持貨成本。

全年摸貨價量新高

另外，今年工商物業炒味極濃，美聯工商估計，全年工商摸售登記量約達756宗，按年升近43%，總值逾27.6億元，按年升幅更逾71%，而全年該類物業摸售量比例將按年升近4個百分點至11.4%，價、量及比例將會係歷年新高。