Fundman睇市：茂業值博率重新浮現

上星期，筆者提到整瓜歐元的最大得益者，非美國莫屬，因為歐元一旦崩潰，債主（各國央行、銀行及全球投資者）將別無選擇，明知美國官民負債已經達天文數字，仍然要接受佢哋印出來的公仔紙。有朋友斥責筆者太過陰謀論，姑勿論看官們信與不信，偏偏咁啱得咁蹺，上周中，幾隻歐豬債息稍為回順，評級機構又出嚟放毒箭，惠譽將歐洲七國列負面觀察名單，穆迪就下調比利時主權評級，結果美股升升吓倒跌之外，早段反彈的歐元兌美元匯價，收市都打回原形，收1.3046，全星期計跌2.6%，是三個月以來最大單周跌幅。

港股過去三個月，响16,170至20,272點之間，以大三角形形態運行，近期上下阻力及支持，經已收窄到唔夠600點（約在18,800及18,240點），好淡友似乎已去到決一勝負之時。

歐央行曲線救歐豬

另一邊廂，歐洲債務危機同樣踏進關鍵時刻。市場對歐央行堅拒直接入市掃入歐豬債，感到失望，如果大家都係咁睇法，無疑係只見樹木不見森林，以德國為首的歐盟死都唔肯大規模的買債增加市場流動性，說穿了，是德國希望趁今次危機，要求一班好食懶飛的窮兄弟，檢討本身的財政紀律。上星期，歐央行入市買歐債規模，去到八星期以來最少，莫非真係睇實幾個歐豬國出事，見死不救？

非也，今個星期三開始，歐央行為歐洲區銀行提供無上限三十六個月貸款再融資操作，簡單講，係低息借錢畀歐洲銀行，等佢哋可以買入歐洲主權債務，重點係降低抵押品要求，即使買入無AAA的主權債務，都可按畀歐央行，賺取息差，計劃等於歐央行透過曲線入市，借歐洲銀行推行量化寬鬆。美國失AAA貸評後，債券不跌反升仍歷歷在目，市場信心比貸評重要，評級機構與歐央行鬥法，今個星期應會白熱化，歐債息假如進一步回落，意味政策收效。講唔埋，港股隨時借勢來個強勁反彈。

歐洲股神安東尼波頓，來港成立富達中國特殊基金，遇上民企風暴慘遭滑鐵盧。然而，這位本來已經退休的股神，未有氣餒，最近開始為唔少民企做盡職審查外，也特別點題部分零售民企，例如金鷹（03308），似有準備東山再起之勢。

因為股神的專訪，近期留意番幾隻百貨股份。唔經唔覺，經過跌市洗禮，唔少股價真係遠比上半年來得平易近人。茂業（00848）五月時股價高位4.39元，現價跌剩三分之一，只得1.62元。毫無疑問，上半年茂業業績的確令人有點失望，營業額按年大升81.8%，純利卻只得5.2%增長，得3.01億元人民幣，由於銷售成本、僱員開支及融資升幅都大於營業額，大大拖低毛利及經營溢利增長。

茂業由半年前三十至三十五倍的增長股估值，跌到低雙位數，得十一倍！五月，公司以3.81元批2.73億股集資，可見管理層把握「時機」之精準，最近公司開始回購，上星期四在1.52至1.62元之間回購2,664萬股，絕對有參考價值，大行對公司的盈利預測，已由半年前的7.2至7.3億元人民幣，降至目前6.3億元人民幣水平，似乎業績唔達標的風險有限，現價博得過。