股海實戰：信義玻璃候4元邊買貨

上周A股坐上「潛水艇」，滬綜指跌穿政策底2,300點後，頭也不回，跌至上周五見低點2,170點，但下午兩點過後終現轉機，內銀及內房股帶領股指重上2,200點關，結束了「六連陰」。市況逆轉是否預示有新嘅利好政策消息出台，能否掀起一場較大幅嘅反彈，為基金年結送上東風，本周將有答案。

阿莊聽表叔線講，其實無論近次政治局會議抑或中央經濟工作會議，決策層內部對當前經濟形勢看法不一，故最終出嚟嘅集體結論係「以不變應萬變」，到危急關頭政府都會出手，但目的不過係「止痛」維穩，明年完成政府換屆工作前，宏觀政策都唔會大改。

上周五A股掉頭回升，港股內房股升勢凌厲，雅居樂（03383）升逾9%、恒大（03333）升近8%、中國海外（00688）及華潤置地（01109）分別升5.4%及9%。同人唔同命，新華保險（01336）H股上周四在港首日掛牌，股價潛水近一成；但翌日其A股喺內地登場，卻報升13.72%收市，輸錢離場嘅H股投資者自然睇到眼火爆！

淡靜市更趨波動

唔經唔覺呢個星期四就係冬至，接下來又係聖誕長假，相信呢個星期股市交投會持續淡靜，但呢啲市就最容易舞上舞落，所以唔排除指數表現會變得波動。暫看恒指短線阻力仍喺20日線18,451點，向下承接區喺17,600至17,800點。少理指數波幅，集中注意力喺基金股身上，博年尾會做番好啲等基金經理們好交差！

今年信義玻璃（00868）嘅大計係分拆太陽能業務上市，惜遇上下半年嘅大跌市，計劃被迫延遲。其實公司冇夾硬嚟未必係壞事，除非極之等錢使，否則冇理由要賤價分拆。

再睇番公司主營嘅浮法玻璃業務，由於市場需求下降，目前行業庫存正處於○九年初以來嘅高水平，估計未來數月產品價格仍有下調壓力，但隨着一些中小型業者不敵淡風減產或停產，相信價格跌幅不會太大。

早前里昂證券報告亦指出，參考○八年下半年及○九年上半年玻璃行業走進周期低點，信義股價卻先於行業見底，喺○九年上半年反彈兩倍多。言則未來六個月，會係留意低吸信義嘅好機會。以其現價計，明年預測市盈率8.5倍，不妨耐心等候股價回試4元邊或樓下，再部署出擊。