80後力攻帝堡城車位

近日股票市場風高浪急，令到唔少投資者見而畏之，至於住宅樓價同樣有跌冇升，加上銀行收緊按揭，身上無幾廿萬都唔使諗上車，更加唔好話買磚頭收租。

不過，近日有一名八十後大學生投資初哥，諗到用較少嘅錢，買沙田帝堡城車位長線收租，租金回報有6.6厘咁高，佢仲計劃一路儲錢、一路掃貨咁話。

陽光物業陳世民同劉Sir傾開，近日有個讀緊會計同經濟系嘅八十後大學生，儲到少少錢，想學吓投資生財，但見股票市場升升跌跌，手頭上嘅錢又唔夠買樓入市，計過後，終於決定買帝堡城一個單號車位收租，作價約30.8萬元，以車位月租約1,700元計，租金回報有約6.6厘，比投資住宅物業更高。

風險細 保養成本低

據了解，一般買車位可借七成或五成按揭，以上述個案做例子，借七成嘅首期十萬元有找。據聞，個大學生仲話，買車位風險比住宅細，唔怕租霸之餘，保養成本近乎零。同時帝堡城附近康林苑、廣林苑及廣源邨等居、公屋嘅停車場，車位面積較細，難應付大車要求，所以帝堡城車位相當渴市，現時屋苑買賣車位放盤僅20個，但係啱價嘅不足5個，個學生亦決定繼續儲錢，目標喺要買夠半打車位，做個車位包租公。

事實上，近期車位依然有炒味，但絕對要識入貨，揀啲供應少、需求大嘅地區，買個車位轉一轉手絕對好搵，好似東涌東堤灣畔前排拆售一手車位，有買家以約33萬元入貨，過咗兩個星期即時轉手，眨眼間帳面即賺約5萬元，升幅超過15%。另外，荃灣萬景峯之前賣嗰啲車位，一手價成百萬元一個，但有個買家用約94萬元入貨，兩個月之後即刻轉手，期內亦賺咗成6萬元有多，真係易過炒股！