股海實戰：龍工毋須睇太淡

內地滬綜指跌穿政策底2,300點後毫無反彈之力，港股繼續向下，恒指跌穿18,500點關，直墜全日低位18,297點始告回穩。呢期金魚缸日日上映「魚樂無窮」催眠，搞到班經紀同股民好冇癮！若然今日中央經濟工作會議冇驚喜，只好收拾心情提早放假。

內地官方報章頭版頭條大事報道內房話題，指調控正處關鍵時刻，未到放鬆嘅時候，喺經濟工作會議前率先高調表明立場，難怪內房股冇運行。尋日滬綜指創一年新低，成交較上日增加，反映確有部分投資者死心沽貨離場。

家電行業步入寒冬

有消息指內地大型家電零售商自上月起開始大規模裁員，皆因政府補貼分階段完結，家電銷售增長放緩，加上內地經濟增長放慢，商家對明年零售市道展望趨於審慎，在商言商及時調整銷售規模亦無可厚非，但連大型業者都要諗整頓，中小企點樣做落去，實乃疑問。

據講明年一月內地將召開第四次全國金融工作會議，呢個會每五年一次，對上三次都有重大舉措，如成立中保監、中證監、中銀監、推動金融業改革，以及成立中投公司等等。傳聞今次會議主題包括加強外匯管理，研究與其他新興市場國家構建國際評級機構，以及設立機制扶助中小企業。想預視未來五年內地嘅金融業發展走向，呢個會值得大家關注。

明年中國要「保經濟」，政府必須繼續維持內需暢旺。專門從事銷售建築機器及相關融資租約業務嘅龍工（03339），今年上半年賺11.54億元人仔，同比增長24.6%，綜合毛利率同比上升一個百分點至26.2%，但現價往績市盈率僅五倍多，皆因市場預示明年建築機械市場需求放緩，但阿莊相信，保障房建設所帶動嘅需求有助抵銷部分影響。

最近高盛將龍工評級下調至中性，目標價調低至2.9元，即相等於一一及一二年預測市盈率6.4及6.6倍，估值相當保守。見大股東自今年七月開始入場增持，由每股平均價4.03元買到落2.58元，新加坡政府投資公司（GIS）十一月初減持完月底又入場買番，照計又唔係咁差。睇走勢，短期向上主要阻力喺3.2至3.4元，主要支持區則喺2.2至2.4元，2.4元樓下可以小注一試。