層樓夠罕有租售梗無憂

近期樓市走勢每況愈下，全城都聽到有減價以及低市價成交，不過「物以罕為貴」，尤其係鮮有放售或放租嘅優質單位，往往喺淡市下成為逆市奇葩。劉Sir收到風，荔枝角美孚新邨高層「凸海」單位以1,500萬元售出，呎價8,192元，仲創埋屋苑歷史新高；另外，荃灣中心連天台戶每月呎租25.4元租出，直逼港島藍籌屋苑太古城。

買家為求「心頭好」願意一擲千金，代理老友美聯余柏同劉Sir講，上述美孚新邨8期百老匯街108號高層B室「凸海」單位，面積1,831方呎，啱啱以1,500萬元獲用家承接，呎價高達8,192元，成為屋苑歷來成交呎價最高單位。

高層大單位罕有放盤

佢仲話，好似美孚新邨呢類大單位，市場放盤只係得番大概2至3個，再加上同類型高層放盤更加係絕無僅有，所以即使個單位內櫳只係得普通裝修，但係買家都願意以歷史新高嘅呎價接貨。

荃中287呎月租七千三

該行梁浩文亦爆料，屯門卓爾居2期一個連天台特色戶，係市場同類罕有放盤，單位面積925方呎，剛以523.8萬元售出，呎價5,663元，成交呎價之高係近十年罕見。

至於租務市場方面，老友美聯梁仲維話，上述以每月呎租約25.4元租出嘅荃灣中心3座頂層特色單位，面積287方呎，成交月租約7,300元，單位以雙露台及天台設計，坐享東北樓景，係屋苑極為少數嘅同類租盤，可謂「租咗就無」，所以成交呎租媲美唔少港島屋苑。

事實勝於雄辯，數據係唔會呃人，好似最近港島大型屋苑鰂魚涌太古城一個面積670多方呎嘅低層單位，成交呎租亦只有22元水平。

對比上述荃灣中心嘅特色戶，成交呎租約25.4元，如果話該盤呎租直逼港島藍籌盤，亦絕對不為過。