股海實戰：大唐發電提防死亡交叉

本來市場對歐盟峰會有頗大期望，點知上周五傳來嘅係利淡消息，搞到股海大幅震盪，港股喺萬九點邊搓咗幾日波，終於開出單邊市，恒指急跌521點收市，報18,586點，成交額547億元，幾隻大型新股招股反應又差強人意，四方八面嘅冷鋒侵襲股海，叫投資者感到極度不安！尤幸周五晚歐美股市顯著回升，為市場帶來些少暖意 。

上周五內地公布十一月份CPI數字，按年增幅為4.2%，較市場預期為低，顯示中央嚴控通脹嘅措施收到成效。面對近月內房市場持續調整，經濟加速下滑，熱錢加速流出內地，中央斷不可能坐視不理。故阿莊仍相信，近次下調RRR只係放寬銀根嘅一個開端，本周一至三召開嘅中央經濟工作會議，會否傳來提振人心嘅消息，滬綜指2,300點係咪政策底，好快有答案。

來年經濟睇淡居多

時近年尾，金融機構陸續發表明年經濟及股市展望，整體嚟講都係「口淡淡」居多，理由離不開歐債危機手尾長，以及內地經濟下滑風險增加兩大原因。今大家對一二年展望咁悲觀，結果會係比任何人想像嘅差，抑或比大家想像般好，阿莊認為關鍵在於祖國，只要祖國力保經濟穩定大局，港股萬六點仍可視為重要底部支持，但若然連祖國經濟都出問題，咁就冇謂再估底了。呢一刻，阿莊自問唔係樂觀派，但對祖國仍存期望。

本周市場焦點，除咗歐盟峰會餘音及中央經濟工作會議之外，本周四有三隻巨無霸新股周大福（01929）、新華保險（01336）及海通證券（06837）將會同時登場，能唔能夠力守招股價，呢個大場面仲好過睇戲！

內地通脹壓力緩減，理論上可預示電價尚有上調空間。見上周五龍頭股華潤電力（00836）股價逆市升逾2%，但其他電力股就冇咩睇頭，其中大唐發電（00991）股價微跌0.41%，收報2.43元。

上周大唐公布上調電價，燃煤及水電機組加幅分別為6.5%及6.64%，配合發改委限制煤價措施，應有助紓緩其成本壓力，只係股價由十月初低位已累升逾五成，已頗大程度反映利好消息，且須提防本周圖表可能出現死亡交叉（10日線跌穿20日線）利淡訊號，暫宜觀望50日線2.2元承接再作打算。