樓市出更：代理等摺埋又一鐵證

樓市轉靜已經唔係新聞，早排已經聽聞唔少中小型地產代理行捱唔住要摺埋，近日連兩大代理行都話會密切注視，即係嚟緊一段時間都難望有好景。情況真係咁悲？劉Sir搵過班代理索料，佢哋個個唉聲嘆氣，話二手成交仲靜過海嘯時，就快拍得住「沙士」咁差。

其實自從港府推出額外印花稅後，即時打沉班短炒客，加埋銀行收緊按揭貸款，中長線投資者入市都要諗過度過。經濟前景暗淡，用家上車換樓更加審慎，三種主要客路都斷晒，成交想唔縮都難。

僅愉景灣金獅超10%

有代理就畀咗全港30個指標屋苑今年（截至十二月七日）成交數字畀劉Sir參考，數字不單止比舊年大跌四成，註冊量唔夠萬二宗，平均流通率更加只有6.4%，相比舊年有成11.7%，明顯大幅萎縮。值得留意嘅係，今年只有大嶼山愉景灣同埋大圍金獅花園兩個屋苑嘅流通率僅僅達到雙位數，而舊年流通率超過10%嘅屋苑就有20個，即係大部分屋苑僧多粥少情況嚴重。

高價盤流通率最低

今年二手成交最淡屋苑係薄扶林置富花園，流通率只有3.8%；至於唔足5%嘅就有成10個，而且大部分係中高價嘅藍籌屋苑，好似鰂魚涌太古城、康怡花園、紅磡黃埔花園、鴨脷洲海怡半島同藍田滙景花園等。

相反，流通率超過7%嘅屋苑，大部分單位成交價介乎200萬至500萬元。依家細價樓當道，代理就自然難有大茶飯。