股海實戰：太平炒影子概念

人行三年內首次下調RRR尋日起實施，變相釋放4,000億人仔，但A股照樣走低，滬綜指曾低見2,327點，真係弱過藥煲！幸好港股未受影響，恒指先跌後回升，企穩喺19,100點樓上，只係成交淡靜，僅521億元，主要受IPO活動凍結資金影響，加上時近年杪，除非再有重大利好消息，否則投資者喺現水平入場追貨嘅意欲唔大，見尋日大市沽空額降至31.64億元，沽空比率僅6.1%，可見連空軍都提早歲晚收爐！經驗告訴阿莊，呢啲市最容易失驚無神被舞高弄低，仍留喺魚缸搵食嘅炒家要打醒十二分精神！

意大利內閣同意300億歐元緊縮方案，嚟緊一個星期歐洲危機發展進入關鍵時刻，皆因歐盟兩位老大哥德國及法國嘅領袖將會碰頭，且市場觀察歐洲央行議息及歐盟峰會結果，IMF會否一如預期出手相助亦係焦點！

內銀內房走勢偏強

上周話會（目及）實安碩A50中國（02823），點知尋日低位只落過10.84元，反正滬綜指已逼近上周低位，唔爭在等滬綜指下試2,300點承接再作打算。

反觀香港嘅內房及內銀板塊走勢偏強，內銀中以中信行（00998）同重農行（03618）表現較佳，升幅均逾2%。兩隻恒指新貴康師傅（00322）及旺旺（00151）榮辱互見，康師傅跌1.7%，但旺旺升3.1%，表現確比想像中強。

趕年關集資，新股活動進行得如火如荼。周大福（01929）係較多人熟悉嘅新股，會唔會益散戶就要等着瞧。反而隻新華人壽（01336）招股作價務實，話唔定可以爆冷跑出。

事實上，若然人行調低RRR意味貨幣政策有所轉向，內險股有望逐步走出行業低谷。趁內險板塊有IPO活動，又睇睇啲影子股。中國太平（00966）現價做16.02元，往績市盈率12倍，市帳率2.1倍，論估值中規中矩。公司並沒有持有「歐豬」四國債券，雖然短期業績增長放慢，但隨着內地通脹壓力消除、加息憂慮消失，加上宏觀政策「微調」展開，相信其壽險及產險業務嘅經營情況有改善空間。

不過，公司實際營運與股價表現總存在時差，短期可藉A股低位震盪趁機低吸。論走勢，九月以來股價底部支持緩緩上移，反映承接力得到改善，尋日成功重上50日線，14日RSI亦回勇，估計波幅介乎14至18.5元，可於此區間玩上落。