樓市出更:沙士夠膽買舖狂賺十倍
講起○三年沙士嗰陣,全港樓價大插水,唔少代理老友都話,當時瞇埋眼喺市區執平貨,只要揸到依家賣,閒閒地升值幾倍;好似北角城市花園附近電氣道一幢舊樓地舖,以約3,200萬元連約賣咗,個投資者好有眼光,喺沙士嗰陣以近300萬元買入,依家帳面袋咗超過2,900萬元,期內樓價飆升逾十倍,好多一線舖都做唔到。
近幾年本港零售市道表現唔錯,好多靚舖都畀人炒貴晒,樓價升幅動輒數倍,不過啱啱講開嘅北角地舖八年間飆升咗超過十倍,就非常罕見。利嘉閣(工商舖)聯席董事劉偉成同劉Sir講,個投資者○三年第二季期間,睇中個舖喺市區,又近港鐵站,位置優越,放盤價又好筍,就拍板以近300萬元購入,比起一般同類地舖平咗大約七成。
收租回報約兩厘半
佢仲話,幾年前有個投資者透過代理問盤,諗住畀1,500萬元左右洽購,但業主財力雄厚,當時堅決唔賣,近日終於肯以約3,200萬元割愛,呎價超過4萬元,揸咗八年帳面勁賺逾2,900萬元,劉Sir除咗羨慕之餘,都要讚嘆佢嘅眼光。據悉上址依家有幾個民生商戶租客,新買家收租回報有兩厘半。
一份最新報告就指出,店舖買賣愈來愈少,八月開始已跌穿300宗水平,不過近排700萬元以上買賣就逆市多番,按月都有一成至兩成半嘅升幅;而2,000萬元以上買賣就企穩喺24宗。
上月商廈註冊升61%
唔知係咪近排歐債露出曙光,香港嘅寫字樓買賣多番,根據美聯商業資料,上個月商廈買賣註冊超過180宗,按月急升逾61%,以目前市況計,相信全年有機會去到3,000宗左右以上水平。
北角電氣道一間舖近日錄得高價成交。