股海實戰：互太紡織攻守兼備

尋日市場盛傳IMF擬向意大利提供6,000億歐元貸款應急，但其後消息卻遭IMF發言人否認，慶幸未有影響亞太區股市反彈勢頭，恒指重上18,000點關，但成交僅412億元。今日期指結算，加上大型IPO招股活動即將展開，料指數會維持窄幅上落，呢個時候可能係炒二、三線股嘅安全期，不妨留意短炒機會。

市場盛傳有關內地部門對兩大電訊商嘅壟斷調查好快會有結果，會唔會係雷聲大雨點小，不得而知，但任何結論將可視為先例，投資者宜多加留意。

旺旺坐定等食胡

MSCI系列指數以及恒生指數近次調整成分股，將分別喺本周三收市後及下周一生效，此前一班新貴又見異動，阿莊坐定定揸住嘅旺旺（00151），尋日一度高見7.77元，收報7.74元，升5.45%，上到7.8至8元會睇位食胡。

紡織股互太紡織（01382）截至九月底止半年收入36.66億元，同比大致持平，但因期內出售一附屬公司錄得2.33億元收益，故半年純利達6.95億元，同比增長53.4%（若不包括出售附屬收益，純利為4.61億元），每股盈利0.49元，派發中期息15仙，另加特別股息25仙。

期內公司毛利率18.4%，同比增加0.2個百分點，主要係經營開支同比跌15%至1.24億元。棉花價格大幅波動、勞工成本上升以及人民幣升值，業界經營十分困難，相比之下，互太嘅經營表現穩定，算係唔錯。除咗成本控制得宜之外，截至九月底止，公司手持現金約19.62億元，沒有銀行貸款，財務狀況穩健，加上派息慷慨，以往績計，現價市盈率7.5倍，息率7厘，而今次中期連同特別股息已高於去年全年派息，假設預測每股末期息與同為0.19元，即現價預測息率高達12厘。

老實講，類似互太呢類工業股，四平八穩，喺大旺市唔多起眼；但喺大淡市，即使要計及明年經濟增長放緩而要為估值打折，憑着業績穩定、高息以及財務狀況穩健三大優勢，誠屬攻守兼備之選。下月十二日除淨前，4至4.5元上車可博財息兼收，但礙於交投不算太活躍，只宜小注嘗試。