樓市出更：金獅車位開低六成拍唔出

額外印花稅壓制住宅成交，帶動工商類物業交投大旺，其中入場費較低嘅車位，更加成為熱門搶手貨；不過樓市逆轉，工商物業亦難獨善其身，車位交投勁跌，有去年購入金獅花園車位業主，將車位僅以10萬元開價拍賣，較購入價低達六成，雖然都吸引到買家搶高四成到14萬元，但最終都係賣唔出。

舊年政府開徵住宅額外印花稅，令工商物業成為唔少投資者資金嘅「避難所」，發展商亦相繼推出車位發售，而入場費只係廿幾至三十幾萬元，所以推出一陣子就賣清光。

搶至14萬未到價收回

好似華懋舊年八月中推出嘅大圍金獅花園車位，同埋沙田富豪花園車位，每個二十幾萬元，迅速賣個滿堂紅。不過响歐債危機影響之下，本港樓市無運行，連帶工商物業亦受影響，尤其突然有大批供應嘅車位，更加首當其衝，需求大幅收窄；劉Sir尋日就去咗忠誠拍賣，事關有個金獅花園2期車位只係以10萬蚊推出。

據講個車位開價比購入價低咗六成，雖然喺拍賣期間吸引到兩個買家競投，仲更一度搶到14萬，比開價高四成，不過始終同購入價差一大截，最終都係未到價要收回。

代理老友世紀21奇豐羅慧君同劉Sir講，金獅花園依家有大概50個車位放售，大部分都係早排喺發展商手上買返嚟，當時平均每個售價大約27萬元左右，唔少買家都諗住每月租到1,600至1,700元左右，點知現時市值月租都只係1,100至1,200元，所以好多業主平手甚至微蝕都肯放。

屯門舖高開價12%賣出

另外，尋日拍賣場只係賣出一項舖位物業，係屯門悅湖商場地下104及105號舖，面積分別142及138方呎，合共以430萬元沽，比開價383萬搶高12.3%。