Fundman睇市：偉易達後市毋須睇淡

十個牛皮九個淡，恒指上星期開始連跌五日，到周二反彈，得25點進帳，市底有幾弱，路人皆見，借滙豐十一月中國製造業指數（PMI），跌至48的三十二個月低位，港股又再玩笨豬跳，一跌就387點，收報17,864點，經過八、九月跌市，十月芬佬焗住補貨之後，新一輪購買力消耗殆盡，又多了一批蟹貨，一個月之內，恒指連穿兩萬、萬九、萬八，成交仲愈玩愈縮，博反彈仲未係時候。

唔少股民一○年買貨後，抱住唔贏唔走心態，到今年八、九月急跌方知為時已晚，坊間不少人以為外資賓架今年肯定大獲全勝，但以筆者暫時所知並非如此，今年不論主攻投資的buy side基金經理、sell side的銷售人員，以至包銷、保薦及交易員，無不愁雲慘霧，唔少大牌基金睇錯市，就連唔理升跌最緊要有成交的投行銷售部，都因為市況淡靜，生意少一大截，最弊係唔少外資行年初擔心政府插手花紅分發，普遍大幅提高基本薪酬，令成本大增，一遇逆境，惟有手起刀落，近期幾乎隔日都收到投行朋友的「last day」電郵，中半山及貝沙灣等賓架聚居地，租務市場明年肯定凍過水。

金融股低處未算低

歐債危機沒完沒了，銀行乃百業之母，由幾隻跨國銀行股價，大抵可以計計歐美主要股市，再見十月初低位可能性未可抹殺。睇滙控（00005）股價由56.35元反彈上70.85元見頂，昨收57.05元，跌番反彈升幅的95.2%，技術派認為，連升幅76.4%支持都企唔住，未見底機會好大。再睇美銀美林，股價由5.13美元升至7.45美元，76.4%升幅回吐支持在5.67美元，前晚收5.37美元，穿咗；摩通由27.85美元升至37.54美元，76.4%升幅回吐支持在30.13美元，現價29.41美元，亦穿埋，睇怕金融股係低處未算低。

歐美經濟唔掂，但觀乎偉易達（00303）剛公布的中期業績，上半年度純利僅輕微倒退約5.4%，表現已算有交代。隨着公司推出新產品及聖誕旺季將至，下半年度業績仍樂觀，毛利率亦有望止跌，加上股息率吸引，前景未宜看得太淡。

偉易達截至九月底止中期收入按年增5.4%至8.58億美元，惟受成本上漲拖累，其純利輕微倒退5.4%至8,850萬美元。期內毛利率按年下跌1.8個百分點至30.4%。由於原材料價格已見回落，在公司加強自動化生產下，預期毛利率再跌空間有限。

現時北美、歐洲及亞太區佔其總收入分別達50.2%、39.2%及5.6%，未來公司將專注於內地市場，並期望五至八年後，北美、歐洲及亞太區業務各佔營業額約三分之一。

公司新產品InnoTab於十月在北美市場正式推出，摩根大通報告指，該款兒童教育平板電腦，將會是偉易達於聖誕節的銷售焦點，其定單亦符合管理層預期，將其投資評級上調至「增持」，目標價調高至98元，相當於一三財年預測市盈率13.9倍。事實上，第四季主要原材料價格將較前兩季回落，故下半年度業績表現應較佳，加上公司財務狀況穩健，應有能力應對宏觀經濟調整，可視為優質工業股的吸納對象。