股海實戰：蒙牛乳業蓄勢突破阻力

歐債危機已演變成一個長期嘅問題，好似一個大腫瘤，喺未來一般日子繼續困擾全球經濟。經濟發展存周期性，魚缸漲跌總有時，只係今次停留喺浪底嘅時間可能較長，來年能平平淡淡過日子已算萬幸，謹記「知足常樂」﹗

內地通脹已見頂，多項指標亦顯示經濟增長正在放緩，尋日滙豐十一月中國製造業PMI初值更創三十二個月新低，但上大人遲遲唔肯出手相救，皆因深明呢場仗有排打，急着出招只會浪費彈藥！尋日滬綜指及深成指分別跌穿2,400點及10,000點心理關口，年關前節日氣氛及市場流動性趨緊，將繼續壓抑魚缸人氣。

死亡交叉隨時再現

回說市況，港股話咁快失守萬八點關，尋日最低見17,838點，收報17,864點，跌387點，成交531億元，窩輪及牛熊證佔大市成交額39.9%。目前恒指10日線已跌穿20日線，而10日線仍處50日之上，但相距不到兩百點，一旦再現死亡交叉，走勢將再進一步轉弱，失守十月廿日低位17,782點的話，下個位要睇十月上旬嘅上升裂口位17,179至17,505點；反彈主要阻力位已下移至18,600至18,700點。

前日股價大跌嘅中國煤層氣（00578），獲證實大股東抵押持股遭斬倉，股價反彈54%。另見劉央愛股高銀地產（00283）尋日股價亦一度質低44%至1.24元，收報1.88元，跌15%，成交增至4,250萬元。無論係大股東押股遭斬倉，抑或基金調整組合套現應付贖回，主因都不離市場「缺水」，二、三線股受「水荒」衝擊較大，恐怕嚟緊股仔大幅波動嘅例子，將會係一不離二、二不離三，故宜繼續迴避為妙。

四大內銀十一月首二十日新增貸款僅約1,000億元人仔，這解釋了為何上月中A股開始嘅反彈浪，至本月中旬經已無以為繼，內銀股沽壓沉重，都係少做少錯。反觀十一月CPI數字將於下月九日公布，相信通脹將進一步回落，未來兩周可留意內需股表現。

久未有提及乳品股蒙牛（02319），今年首季股價已度過最黑暗時期，之後持續反彈，至九月受民企風波影響，股價急跌至十月初低位21.7元始回穩，本月以來表現算係強於大市。以現價26.45元計，預測市盈率約二十二倍，與各龍頭飲料股水平相若。由七月高位28.9元延伸嘅阻力位，目前處於27.5至28元水平，且看年底前能否成功突破，50日支持喺25.5元。