樓市出更：商廈收租客灣仔搶盤

中區甲級商廈樓價升勢唔錯，但租金升幅就追唔到樓價，於是拖低收租回報。鄰近嘅灣仔區喺多項重建計劃帶動下，依家商廈租金回報率有2.5至3.5厘，遠比中區高，所以唔少中區收租客最近轉投灣仔區，令區內嘅東區商業大廈、北海中心及凱利商業大廈連約單位，最近出現高市價搶購情況。

有地產代理同劉Sir報料，今年中區甲級商廈樓價已經升咗約兩成，但係同期嘅租金升幅僅約一成，令到現時回報率一般只得約2至2.5厘，反觀期內灣仔區商廈租、售價升幅較溫和，區內現時收租回報率普遍有約2.5至3.5厘，所以最近多咗一批中區收租客願意用高價入市。

北海中心搶高半成

好似東區商業大廈中層全層面積約4,500方呎單位，近期由投資者以約3,470萬元連約買入，呎價約7,700元，高市價約3%，以單位現時月租約8.55萬元計，收租回報率高近3厘；而北海中心亦都有一個中層連租約單位，由投資者斥資約1,125萬元買入，亦高市價約半成，用依家租金約3.3萬元計，回報率逾3.5厘。

凱利連約兩客爭購

由於多咗收租客喺灣仔搵盤，個別有連約單位出現買家爭住洽購，其中凱利商業大廈中層連約戶，面積約3,500方呎，現時呎租約23元，以業主叫價約2,950餘萬元計，租金回報率約3.2厘，所以上星期就吸引兩組收租客同時洽購。

美聯商業助理營業董事羅仲英認為，由於政府短期內未必就額外印花稅進行修訂，加上港股表現反覆，所以收租回報比較高嘅連約商廈單位，仍然會受追捧。