股海實戰：中興通訊可以睇位翻兜

歐洲債務危機已形成一場新嘅大風暴，唔知點收科，再咁落去唔單只歐盟老大哥德國同法國遲早被燒到埋身，就連美國亦難免受到負面影響。外圍形勢嚴峻，十一月上半場本可憧憬紅色力量回勇撐住半邊天，點知踏入下半場連A股都頂唔順掉頭回落，滬綜指失守2,500點關，上周五回落至2,416點收市，港股內銀、內險同內房股都顯得疲憊不堪，冇咗呢三股力量，國指真係難有運行！

講起國指，八月以來已多次反彈至11,000點關掉頭，大型阻力區經已形成，上周五更再度失守10,000點關，喺預期明春之前中央都唔會大幅放鬆銀根之下，呢個寒冬唔易過，各位要好自為之。

恒指現死亡交叉

上周五恒指跌穿50日線，10日線亦跌穿20日線，即所謂「死亡交叉」，如無意外，本周向下回補上升裂口位18,082至18,435點機會甚大。藍籌股之中，大笨象（00005）上周經已失守60元關，騰訊（00700）150元關危危乎，港交所（00388）亦須考驗120元支持。嚟緊又有周大福、新華人壽、海通證券等多隻大型IPO要趕搭尾班車，究竟港股如何承受咁大數目嘅集資額，真係一個謎，至少喺未來兩、三個星期，現貨成交將會持續淡靜，大動作可免則免，投機炒作亦宜嚴控注碼。

講番個股，上周提及嘅海爾電器（01169）同上海醫藥（02607）表現都優於大市。憧憬「十二五」產業規劃報佳音下，電訊設備股份亦成炒家樂園，上周五晨訊（02000）、星辰通信（01155）及中信國際（01883）股價都逆市上升，另大價股中興通訊（00763）表現亦堅挺，收報24元，升1.48%。

相對於七月上旬至八月中旬嘅跌浪，過去三個月中興嘅反彈浪算係溫和，近月升勢加快，主要係受公司出售國民技術股份錄得特殊收益嘅利好消息刺激。中線而言，近年公司積極拓展手機業務，以出貨量計，已成為全球第四大生產商。隨着智能手機日趨普及，公司加大力度增加智能手機業務比重，毛利率有改善空間。

睇番走勢，以七月高位29.6元，回落至八月中旬低位17.12元，反彈跌幅嘅一半即係喺23.36元，上周叫做突破咗呢個位，以反彈跌幅嘅0.618計，下個阻力位喺24.8元。短線衝25元關後回落嘅話，有貨可考慮先行獲利，待回試22至23元水平承接，先至再留意翻兜機會。