樓市出更：細單位供應爆燈

早幾年市場不斷有人話「上車難」，皆因發展商起樓偏向起豪宅大單位，不過，喺政府積極「催生」細單位下，呢幾年情況已經有改變，劉Sir發現，今年頭九個月落成嘅6,700伙住宅單位，佔近6,000伙都係實用面積（下同）細過752方呎嘅中小型單位，佔整體落成量超過89%，主要供應都係响新界區，而面積近1,100方呎以上嘅大單位，過去九個月合計只不過多咗200幾伙。

睇番屋宇署資料，頭九個月獲批入伙紙項目有146個，工程報價總值159億元，當中住宅樓面有超過610萬方呎，計番住宅單位有6,686伙，其中喺第三季落成嘅住宅就佔咗2,189伙，比起第二季多78%，而中小型住宅就佔咗1,836伙，佔季內落成量差唔多八成半。

大角咀項目清一色細戶

睇番第三季落成嘅新盤，唔少都有提供中小型住宅單位，好似八月份新地（00016）攞到入伙紙嘅將軍澳天晉，當中有成988伙係中小型單位；另外，市建局大角咀洋松街項目，370伙裏面幾乎全部都係清一色中小型單位，淨係呢兩個項目就帶嚟近1,400伙中小型住宅單位。

過千呎戶僅增逾200伙

至於頭九個月面積小過431方呎嘅細單位落成量有近3,600伙，佔期間整體落成量近54%，其中首季落成，由長實（00001）發展嘅將軍澳日出康城領峯同埋系內馬鞍山天宇海，兩個項目亦加埋有提供接近1,500伙細單位。

今年落成量集中在面積752方呎以下的中小型單位，而過千呎大單位今年只有200多伙，其中面積1,722方呎以上單位，更只得33伙，當中包括新世界（00017）嘅大坑春暉8號佔有4伙。