市場徐想：救市基金難孭歐債

歐債危機燒到埋身，希臘政局又不穩，歐洲金融穩定機制（EFSF）當然要再做嘢！依家救市基金規模4,400億歐元，喺扣除為愛爾蘭、葡萄牙仲有希臘預留嘅資金後，就只剩低2,500億至3,000億歐元。以救市基金嘅槓桿程度而言，擴大一倍都只能增至約8,000億歐元！另一建議係，EFSF為歐債提供局部損失嘅擔保。之前官員將損失擔保水平定為20%，稍後可能要將擔保水平提高至30%。事實上，為損失提供擔保，以及谷大EFSF個槓桿，係兩條好唔同嘅路；前者係用僅有嘅資金，為「一旦有起事上嚟」嘅情況孭飛；後者就係瘋狂注資，有起事上嚟，人地走數，你就中晒招！

聯儲局主席伯南克上星期喺答問大會度話，美國經濟過去兩年已恢復增長，又話美國經濟前景繫於歐債危機嘅結果，又勸喻央行唔好加速通脹去振興疲弱嘅經濟。不過，伯老講嘅嘢好多時會因為市場改變而變招，佢過往都好多次出其不意量化寬鬆，今次可能亦只係故技重施。